Бүгінде үй жануарларының саны артып, оларды қорғау, тіркеу және жоғалған жағдайда табу мәселелері өзекті бола бастады. Осыған орай, иттер мен мысықтарды сәйкестендіруді міндеттеу туралы Қазақстан Республикасының 2021 жылғы 30 желтоқсандағы № 97-VII ҚРЗ «Жануарларға жауапкершілікпен қарау туралы» Заңы қабылданды. Бұл бастама жануарларды қорғау мәдениетін қалыптастырып, олардың қауіпсіздігін қамтамасыз етуге бағытталған.
Сәйкестендіру – жануардың ерекше мәліметтерін тіркеу және оларды бірыңғай ақпараттық жүйеге енгізу процесі. Ол микрочип енгізу, таңба қою немесе арнайы төлқұжат беру арқылы жүзеге асырылады. Қазіргі таңда ең қолайлы әрі қауіпсіз әдіс – микрочип орнату. Бұл кішкентай құрылғы тері астына орнатылады. Мұнда жануар туралы барлық мәлімет сақталады.
Сәйкестендірудің пайдасы көп. Егер жануар жоғалса табу жолы жеңілдейді. Ветеринария қызметі чипті арнайы сканер арқылы оқып, иесіне хабарласады. Бұл біріншіден, жануарларға қадағалау қажет екенін көрсетеді. Сәйкестендіру жүйесі иесінің жануар алдындағы міндеттерін тануға мүмкіндік береді. Сонымен қатар, құқықбұзушылықтардың алдын алуға септігін тигізеді. Қаңғыбас жануарлар саны азайып, олардың тағдырына қатысты мәселелер заңды түрде шешіледі. Барлық үй жануарының мәліметтері тіркелгендіктен, аурулардың таралуын болдырмау жолы жеңілдейді. Бұл эпизоотиялық қауіпсіздік үшін пайдалы. Ол үшін ветеринариялық клиникаларда немесе мемлекеттік ветеринариялық мекемелерге жүгіну қажет. Сәйкестендіру жұмысы жылдам және жануарға зиянсыз түрде жүзеге асырылады. Микрочипті орнату бірнеше минут ішінде жүргізіледі. Оның жарамдылық мерзімі 25 жылға жетеді.
Ит пен мысықты тіркемеген жағдайда «Әкімшілік құқықбұзушылық туралы» Кодекстің 407-2-бабына сәйкес, Қазақстан Республикасының жануарларға жауапкершілікпен қарау саласындағы заңнамасы бұзылады. Жануарларын сәйкестендірмеген жандарға әкімшілік айыппұл салынады. Бұл адамдардың жануар алдындағы жауапкершілігінен жалтарғанын көрсетеді.
Иттер мен мысықтарды сәйкестендіру тек заң талабы ғана емес, сонымен қатар жануарларды қорғау мен қауіпсіздігін қамтамасыз етудегі үлкен қадам. Әрбір жануар иесі осыны түсініп, жауапкершілікті сезінуі керек. Бұл мәдениет қалыптасса, қоғамдағы жануарларға деген көзқарас жақсара түседі.
Облыстық ветеринария басқармасы
Фото: zhalagash-zharshysy.kz
