Бейсен Құранбек атындағы Журналистер үйінде «JETISU DIGITAL: өңірдің цифрлық экожүйесі қалай дамып жатыр?» тақырыбында баспасөз мәслихаты өтті. Жиында өңірдегі цифрлық жобалардың нәтижелері айтылып, тың дүниелер таныстырылды.
Іс-шараға «Astana Hub» өңірлік хабының директоры Талғат Аблаев пен өңірлік менеджері Айгерім Шаймерденова қатысты.
Спикерлердің айтуынша, Jetisu Digital IT-хабы Жетісу облысындағы цифрлық трансформацияның маңызды алаңына айналған. Жыл басынан бері хаб 57 іс-шара өткізіп, оған 1 400-ге жуық адам қатысқан.
Жиында бірнеше жоба таныстырылды. IT Silver Age бастамасы аясында егде жастағы тұрғындар цифрлық сауаттылық, интернет қауіпсіздігі және жасанды интеллект құралдарын қолдану негіздерін меңгеріп жатыр.
AI Ustaz бағдарламасы мұғалімдерге сабақ дайындау, оқу материалдарын әзірлеу және білімді бағалау кезінде жасанды интеллектті тиімді пайдалануға көмектеседі. Бағдарлама Жетісу облысының білім басқармасы және «Өрлеу» ұлттық орталығымен бірлесіп іске асырылуда.
Digital Keruen жобасы аясында мамандар облыстың 10 ауданын аралап, мыңнан астам тұрғынға көшпелі оқыту өткізді. Қатысушылар жасанды интеллекттің білім беру, кәсіпкерлік және күнделікті өмірдегі мүмкіндіктерімен танысты. Жоба облыстық хакатонмен аяқталды. Сондай-ақ Google Developer Groups (GDG) қауымдастығымен бірлесіп, Түркиялық сарапшы Энес Туранның қатысуымен хакатон мен семинарлар ұйымдастырылды.
Алдағы жоспарлар қатарында Digital Arna жобасын іске қосу, хаб амбассадорлары бағдарламасын дамыту, өңірлік IT-форум өткізу, Tomorrow School мектебін ашу және Digital Keruen жобасының екінші кезеңін бастау бар.
Қазір IT-хаб базасында Samsung Innovation Campus бағдарламалау мектебі жұмыс істейді. Биыл шілдеде Tomorrow School ашылып, онда 50 жұмыс орны қарастырылған.
Спикерлер тегін бағдарламалау, веб-дизайн және генеративті жасанды интеллект курстары кеңейтілетінін, цифрлық білім беру жобалары облыстың барлық ауданын қамтитынын айтты.
Аяулым Шынгаева
