Көксу ауданында медициналық мекемесі жоқ 4 ауылына жаңа әдіспен медициналық пункт салынады.
Мәселен, Ақтекше ауылында әлеуметтік нысанның құрылысы басталып кеткен. Ауыл халқымен кездесуден кейін, Марлен Қапашұлы жаңа құрылыстың жұмысымен танысты.
Әкімнің айтуынша, фельдшерлік-акушерлік пункт болу үшін ауыл тұрғынының саны 800-ге жетуге тиіс. Ауылдың үлкен-кішісінің саны 500-ден аз болған жағдайда медициналық пункт салынады.
Былтырдан бері ауданда тез құрылатын блокты-модульді медициналық пункттер тұрғызыла бастаған. Алғашқы заманауи емхана Жамбыл ауылында салынған.
«Блокты-модульді медициналық пунктті салудың артықшылығы, жобалау-сметалық құжат жасалмайды. Әйтпесе сол құжатты жасаудың өзіне бірнеше жыл және қыруар қаржы кетеді. Блокты пункт 1-2 айда орнатыла салатын болғандықтан өте ыңғайлы. Құрылысқа пеноблок материалы пайдаланылады. Ғимарат жарты ғасырға дейін сыр бермейді. Ауласы көгалдандырылып, қоршалады. Ғимаратта үш адам, яғни фельдшер, санитар-тазалықшы және күзетші жұмыс істейді. Былтырдан бері біраз тәжірибе жинап қалдық», — деді аудан әкімі Марлен Көлбаев.
Айта кетейік, құрастырмалы медициналық пункт 10 жылдық Қазақстан, Мұқаншы, Мәулімбай ауылдарында да салынады.
Асыл СҰЛТАНҒАЗЫ
