ҚР Премьер-Министрі Асқар МАМИННІҢ төрағалығымен онлайн режимде селекторлық жиын өтті. Оған Алматы облысының әкімі Амандық БАТАЛОВ қатысты. Жиында жылыту маусымы кезіндегі өрт қауіпсіздігі мәселелері сөз болды.
Селектор барысында Төтенше жағдайлар министрі Юрий Ильин еліміздегі өрт оқиғаларының алдын алу бойынша атқарылып жатқан шараларды, тілсіз жаудың қай өңірлерде өршіп тұрғаны жайлы баяндама жасады. Министрдің айтуынша, биыл 1 қыркүйектен бастап еліміздегі тұрғын үй секторларында 1369 өрт оқиғасы орын алған. Бұл өткен жылмен салыстырғанда әлдеқайда төмендеген. Өрт оқиғасы Алматы, Шымкент, Ақмола, Солтүстік Қазақстан, Қызылорда облыстарында көбейген. Мұның себебі көбіне электр жабдықтары мен пешпен жылыту жүйелерінің дұрыс пайдаланылмауына байланысты.
Бұл мәселе бойынша Асқар Ұзақбайұлы:
– Мемлекет басшысы Төтенше жағдайлар министрлігінің алдына азаматтық қорғау мәселелерін дамыту, өрт қауіпсіздігін қамтамасыз ету, төтенше жағдайлардың алдын алу және жою міндеттерін қойды. Сондықтан, осы бағытта жұмыла жұмыс істеуіміз керек. Өрт қауіпсіздігінің алдын алу үшін нақты әрі тиімді шаралар қабылдау қажет. Әлеуметтік сала объектілерінде орналасқан қазандықтардың жұмысын ерекше бақылауға алып, оларды ғимараттан шығару мәселесін жылдамдатып шешкен абзал. Өртке қарсы қызмет бөлімшелері жоқ елді мекендерде өрт сөндіру бекеттерін құру жұмыстарын жалғастырған жөн. Адам өмірі бірінші кезекте тұрғандықтан, халықты апаттардан қорғауды қамтамасыз ету — басты міндет, – деп, жылыту маусымы кезеңіндегі өрт қауіпсіздігі мәселелері бойынша халықпен профилактикалық жұмысты күшейту туралы тапсырма берді.
Үкімет отырысынан кейін Амандық Ғаббасұлы көтерілген мәселе бойынша жауапты мамандарға нақты тапсырмалар беріп, өрт қауіпсіздігін қатаң бақылауда ұстау қажеттігін айтты.
Айдар ҚАЛИЕВ
Алматы облысы
Сурет — ғаламтордан
