Алматыда күштік құрылымдарға қарасты жоғары оқу орындарының курсанттары Іле Алатауындағы 3500 метр биіктіктегі тау шыңына көтерілді. Бұл айтулы іс-шара тәрбие құрылымдары офицерлері институтының құрылған күніне орай ұйымдастырылды, – деп хабарлайды 7-su.kz ақпараттық порталы.
Аталған акцияның қауіпсіздігін жоғары деңгейде қамтамасыз ету үшін Тау дайындығы орталығының тәжірибелі нұсқаушылары мен Қорғаныс министрлігіне қарасты әскери жоғары оқу орнының медицина қызметкерлері жұмылдырылды. Бұл жорық болашақ офицерлердің тек физикалық қана емес, сонымен қатар психологиялық төзімділігін шыңдауға бағытталған бірегей тәжірибе болды.
Құрлық әскерлері әскери институты бастығының орынбасары полковник Данияр Құдайбергеновтің айтуынша, жорыққа «тәрбие және идеологиялық жұмысты ұйымдастыру» мамандығы бойынша білім алып жатқан курсанттар қатысқан. Ол бұл шараның маңыздылығына тоқталып:
«19 қаңтарда әскерлердің моральдық-психологиялық қамтамасыз етілуіне, әскери ұжымдарда қолайлы ахуал қалыптастыруға және әскери қызметшілердің патриоттық санасын дамытуға жауапты мамандар кәсіби мерекесін атап өтеді. Болашақ тәрбиеші офицерлерге олардың мамандығы тек білімді ғана емес, сонымен қатар күш-қуат төзімділікті, командамен бірлесе жұмыс істей білуді және жеке жауапкершілікті талап ететінін көрсету біз үшін өте маңызды болды», – деп атап өтті.
Шыңды бағындыруға еліміздің ең үздік әскери оқу орындарының өкілдері жиналды. Атап айтқанда, Құрлық әскерлері әскери институтынан, Радиоэлектроника және байланыс әскери-инженерлік институтынан, ІІМ академиясынан, ҰҚК академиясынан және Шекара академиясынан он курсанттан қатысып, өзара ынтымақтастықтың үлгісін көрсетті. Бұл – күштік құрылымдар арасындағы байланысты нығайтудың және ортақ мақсатқа жұмыла білудің көрінісі.
Радиоэлектроника және байланыс әскери-инженерлік институтының курсанты Дархан Дүйсенбек шыңға көтерілу қатысушыларға өз мүмкіндіктерін жақсырақ түсінуге және жолдастарының қолдауын сезінуге мүмкіндік бергенін айтты.
«Шыңға көтерілу арқылы командалық бірлікті сезіндік. Сонымен бірге табиғат аясында ерекше сезімдерді бастан кешірдік. Көрсеткен көмектері мен нақты нұсқаулары үшін тәжірибелі нұсқаушыларға алғысымыз шексіз. Міндетімізді орындағанымызға мақтанамыз», – дейді ол.
Конструктивті журналистика тұрғысынан қарасақ, мұндай бастамалар тек мерекелік шара емес, болашақ офицерлердің кәсіби, моральдық және рухани қасиеттерін қалыптастыруға ықпал ететін маңызды құрал. Әскери-патриоттық құндылықтарды насихаттау және саламатты өмір салтын дәріптеу арқылы біз жас мамандардың жауапкершілігін арттырамыз. Ұйымдастырушылар осындай іс-шаралар алдағы уақытта да тұрақты түрде өткізіледі деген сенімде.
