Талдықорған қаласындағы «Ардагерлер» саябағында 100 түп жапырақты ағаш отырғызылды. Жалпы қала аумағында 200 түп жапырақ көшеті егілді. Экологиялық шараға облыстық энергетика және тұрғын үй-коммуналдық шаруашылық, жолаушылар көлігі және автомобиль жолдары, қаржы басқармаларының және «ЖетісуГазСервис» мемлекеттік коммуналдық кәсіпорнының өкілдері қатысты.
Халықтың экологиялық жауапкершілігін арттыру, қаланың жасыл аймағын ұлғайту және табиғатқа деген қамқорлықты қалыптастыру мақсатында ұйымдастырылған шара өңірдің барлық елді мекендерінде жалғасып, аудандар мен ауылдық округтерде ағаш отырғызу жұмыстары жүргізілуде.
«ЖетісуГазСервис» мемлекеттік коммуналдық кәсіпорны басшысының орынбасары Берік Мәнізоров:
– Президент 2020 жылғы «Жаңа жағдайдағы Қазақстан: іс-қимыл кезеңі» атты Жолдауында 5 жыл ішінде орман қорына 2 миллиард, елді мекендерге 15 миллион ағаш отырғызуды тапсырған болатын. Осы тапсырмаға байланысты 2021-2025 жылдарға арналған жоспарда өңірде 538 мың ағаш көшетін отырғызу көзделген. Қазір бұл көрсеткіштің 418 мыңы жүзеге асырылып, отырғызылған ағаштар өсіп-өне бастады, – деп өңірдегі жағдайға тоқталып өтті.
Мұндай ізгі шаралар тек экологияны жақсартумен шектелмей, тұрғындардың өмір сүру сапасын арттыруға, ауаның ластануын азайтуға және табиғатқа деген құрметті қалыптастыруға септігін тигізеді. Атқарылған жұмыстар қала тұрғындарына табиғатпен байланыс орнатып, жан-жануардың қорғаушысы болуға мүмкіндік береді. Сондай-ақ, Талдықорған қаласының кейпін көріктендіріп, ұлт саулығын жақсартуға әсер етеді.
Ағаш отырғызуға қатысқан қала тұрғыны Нұрболат Әликенов:
– Ер-азаматтың негізгі міндетінің бірі – тал егу, ағаш отырғызу. Тұмса табиғатты ұнататындықтан балаларыма қоршаған ортаны таза ұстауды, табиғатты аялауды үнемі айтып отырамын, – дейді.
Мұндай бастамалар қоғамның қоршаған ортаға деген құрметін нығайта түседі деп сенеміз.
Санжар СҰЛТАНҒАЗЫ
Суретті түсірген Дмитрий Ерофеев
