Жетісу облысында Балқаш көлінің жағалауындағы инфрақұрылымды дамыту жұмыстары қарқынды жалғасуда. Биыл жағалауда үш коммуналдық қоғамдық жағажай салынады, оның екеуін осы жазғы маусымда пайдалануға беру жоспарланған, – деп хабарлайды 7-su.kz ақпараттық порталы Жетісу облысы әкімінің баспасөз қызметіне сілтеме жасап.
Бір мезетте шамамен үш мың адам демала алатын алғашқы жағажай шілде айында ашылады. Ондағы құрылыс жұмыстарының барысымен Жетісу облысының әкімі Бейбіт Исабаев Сарқан ауданына жасаған жұмыс сапарында танысты. Мердігер ұйым өкілдерімен құрылыс барысын талқылаған өңір басшысы бұл жобаның жүзеге асырылуы көл жағалауындағы туризмді дамытуға бағытталған жүйелі жұмыстың маңызды кезеңі екенін атап өтті.
Бейбіт Исабаев Мемлекет басшысының тапсырмасын іске асыру мақсатында Балқаш көлінің жағалауында бірқатар шаралар қабылданғанын жеткізді. Оның айтуынша, алдымен бас жоспар мен егжей-тегжейлі жоспарлау жобасы бекітілген. Одан кейін көлге көлікпен жетуге жағдай жасау мен жағалау инфрақұрылымын дамытуға қатысты мәселелер шешіліп, коммуналдық жағажайлардың құрылысы қолға алынған. Қазіргі кезде жоспарланған үш жағажайдың біріншісі шілде айының алғашқы онкүндігінде, екіншісі тамыз айында пайдалануға берілмек. Үшінші жағажайдың құрылысы биыл басталып, келесі жылдың шомылу маусымына дейін аяқталады. Бұл нысандар халық үшін қолжетімді, жайлы әрі қауіпсіз демалысты ұйымдастыру мақсатында бой көтеруде.
Аталған жобаны табысты жүзеге асыру үшін көлге дейінгі 137 шақырым жол қайта жаңғыртылып, пайдалануға берілді. Қазіргі уақытта жол бойында санитарлық тораптар, демалыс орындары мен қоқыс контейнерлері орналастырылуда. Сондай-ақ кондиционермен және сумен жабдықталған бірнеше жылы санитарлық торап салу жоспарланған. Лепсі ауылына кіреберісте 10-нан астам көлікке арналған тұрақ алаңы ұйымдастырылып, ана мен бала бөлмесі бар жылы дәретхана құрылысы жүргізілуде. Сонымен қатар ұзындығы 9,3 шақырым болатын жағалау бойындағы автожолдың құрылысы аяқталуға жақын. Лепсі ауылынан көл жағалауына дейін 32 шақырым су құбыры, 49 шақырым электр желісі және 16 шақырым кәріз жүйесі тартылып, кәріз-тазарту құрылысы салынуда. Жағалаудың санитарлық жағдайын жақсарту үшін «Балқаш Тазалық» коммуналдық кәсіпорны құрылды.
Жалпы аумағы шамамен 7 гектарды құрайтын алғашқы қоғамдық жағажайда 500 автокөлікке арналған тұрақ, футбол, волейбол, воркаут және балалар ойын алаңдары, беседкалар, душ кабиналары, киім ауыстыратын орындар, күнқағарлар мен шезлонгтар, құтқару мұнарасы орналастырылады. Сондай-ақ арнайы фуд-аймақ қарастырылып, полиция, төтенше жағдайлар қызметінің бекеттері, медициналық пункт және ана мен бала бөлмесі жұмыс істейтін әкімшілік ғимарат салынады. Өңір басшысы алдағы 3-5 жыл ішінде Балқаш көлінің жағалауында Алакөлден кем түспейтін, ретсіз құрылысқа жол берілмейтін қолайлы демалыс жағдайлары жасалатынын айтты.
Балқаш жағалауындағы игі бастамаларға қатысты демалушылар да оң пікір білдіруде. Талдықорғандық тұрғын Абылай Махмет жол сапасының жақсарғанын, көлге небәрі бір жарым сағатта жеткендерін айтып, инфрақұрылымның дамып жатқанына қуанышын білдірді. Сарқан ауданы әкімдігінің мәліметінше, бұл жұмыстар қазірдің өзінде мультипликативтік әсер беріп, жаңа жұмыс орындары ашылуда, тіпті Лепсі ауылында жеке инвестордың қаржысына алғашқы қонақүй салынып жатыр. Қазіргі таңда маусым кезінде көл жағалауында 50 мыңнан астам адам демалса, жоспарланған жобалар толық іске асқаннан кейін мұнда жыл сайын 450 мыңнан астам адамды қабылдауға мүмкіндік туады.
