Астанада салынып жатқан жеңіл рельсті көлік (LRT) жүйесінің тәуліктік жолаушы тасымалдау әлеуеті белгілі болды. Елордадағы қоғамдық көлік қызметін үйлестіретін City Transportation Systems (CTS) компаниясының мәліметінше, жобаның бастапқы кезеңінде LRT қызметін күніне шамамен 45 мың адам пайдаланады деген болжам жасалған, – деп хабарлайды 7-su.kz ақпараттық порталы.
Бұл көрсеткіш жүйе толық іске қосылып, бағыттар мен жолаушылар ағыны қалыптасқан сайын артуы мүмкін.
Ресми деректерге сәйкес, LRT жобасының жалпы құны өзгеріссіз қалған. 2016 жылы жасалған EPC-келісімшарттың сомасы қосымша құн салығын есептемегенде 1,8 миллиард АҚШ долларын құрайды. Бұл қаражатқа желінің құрылыс жұмыстары, депо салу, жылжымалы құрамды құрастыру және оларды Астанаға жеткізу, сондай-ақ қызметкерлерді оқыту сияқты толық іске қосуға дейінгі барлық кезеңдер енгізілген.
Жоба елорданың көлік инфрақұрылымын жаңғыртудың маңызды бөлігі саналады. Мамандардың айтуынша, LRT жүйесі іске қосылған жағдайда қаладағы жол жүктемесін азайтып, қоғамдық көліктің тиімділігін арттыруға ықпал етуі тиіс.
