Еліміздің тоғыз аймағында коммуналдық меншіктегі гидротехникалық құрылыс жайларды пайдалану және басқару бойынша мамандандырылған ұйымдар құрылды.
Бұл Мемлекет басшысының тапсырмасы негізінде жүзеге асырылуда. Атап айтқанда, арнайы мекемелер Ақмола, Ақтөбе, Атырау, Батыс Қазақстан және Солтүстік Қазақстан, Қостанай, Қызылорда, Абай, Жетісу облыстарында жұмысын бастады.
Осылайша, еліміздегі коммуналдық меншіктегі гидротехникалық құрылыс жайларды пайдалану және басқару бойынша мамандандырылған ұйымдардың жалпы саны 15-ке жетті. Қазіргі кезде Су ресурстары және ирригация министрлігі жаңадан ашылған мамандандырылған ұйымдардың функцияларын, міндеттері мен өкілеттіктерін реттеу бойынша нормативтік-құқықтық базаны жетілдіру жұмысын жүргізуде.
ҚР Су ресурстары және ирригация министрі Нұржан Нұржігітовтің айтуынша, әкімдіктер жаңадан ашылған арнайы мекемелерге білікті мамандарды тарту мәселесін қарастыру қажет. Ол үшін мамандардың еңбекақысын көтеру, баспанамен қамту, басқа да қолдау іс-шараларын енгізгені жөн. Бұдан бөлек, мекемелер арнайы техника және құрал-жабдықтармен қамтамасыз етілуі тиіс.
А. ЫБЫРАЙ
Фото: Pinterest
