Жетісудағы белді білім ордасына Италия Республикасы Марке политехникалық университетінің ректоры Энрико Куальярини бастаған делегациясы келді.
Кездесу барысында Жетісу университетінің ректоры Ермек Бөрібаев Қазақстан мен Италия арасындағы білім және ғылым саласындағы ынтымақтастықтың даму барысына тоқталып, оқу ордасында ашылған Марке университеті филиалының қызметі туралы баяндады.
Университет басшылары қос дипломды білім беру бағдарламаларын іске асыру туралы келісімге қол қойды. Алдағы уақытта «Ақпараттық жүйелер – Компьютерлік инженерия және автоматтандыру» (бакалавриат), «Экономика – Әлемдік экономика және коммерция», «Ауыл шаруашылығы ғылымдары мен технологиялары – Жер және ауыл шаруашылығы ғылымдары» (магистратура) бағыттары бойынша жаңа бағдарламалар жүзеге асырылады.
Сапар барысында делегация «Агрономия» қос дипломды білім беру бағдарламасының студенттерімен кездесу өткізді. Жаңа оқу жылында аталған бағдарлама бойынша алғашқы 5 студент оқуын жалғастыру үшін Италияның Анкона қаласындағы Марке политехникалық университетіне жол тартады.
«Жетісу-Ақпарат»
