Сұптай ауылында жаңа мектеп салынуда. Бұл құрылыс білім беру инфрақұрылымын қолдау қоры қаржыландыратын облыстағы екінші оқу орны. Ол сыбайлас жемқорлықтан қайтарылған қаражатқа салынып жатыр.
Сұптай ауылындағы мектеп маусым айының басынан бастап бой көтеруде. Ол 120 орынға есептелген. Мердігерлердің айтуынша, барлық монолиттік жұмыстардың 80%-ы жүргізілген. Ғимарат төрт блоктан тұрады. Олардың бәрі сейсмологиялық талаптар бойынша бір-біріне тәуелсіз. Қазір бірінші қабатты қалау аяқталды. Нысанда 40 құрылысшы жұмыс істеуде.
Учаске бастығы Рүстем Жақашбаевтің айтуынша, олар екі апта ішінде монолитті жұмыстарды толық аяқтамақ. Одан кейін екінші, үшінші қабаттағы кірпіш қаланады. Қысқа таяу жылу жүйесі орнатылып, ішкі әрлеу мен электр монтаждау жұмыстары жүргізіледі. Ал әзірге жергілікті балалар ескі мектепте білім алуда. Ол жарты ғасырдан асқан.
– Бұл мектепте жергілікті тұрғындардың бірнеше буыны оқыды. Ешқандай жағдай жоқ. Қыста өте суық, оқу сыныптары жетіспейді, дәліздері тар. Мұнда мұғалімдерге де, балаларға да сабақ өту өте қиын, – дейді Сұптай ауылының тұрғыны Советхан Мамаева.
Сұптай ауылы таяу уақытқа дейін экономикалық ахуалы нашар елді мекендердің қатарында саналды. Қорғас көлік торабын дамытудың арқасында мұнда халық саны артты. Сәйкесінше, демография да өсіп келеді. Сол себепті медициналық пункт пен мектептің жаңа ғимараты қажет болды.
Жалпы, бұл мектепте жоғары білікті құрам бар. Олар 3 зерттеуші, 11 сарапшы және 14 модератор-педагогтар. Түлектерге сапалы білім беріледі. Нәтижесінде оқушылардың 80-90%-ы мемлекеттік гранттардың иегері атанды.
Ал аудандық білім бөлімінің аға әдіскері Райкүл Қарабалаеваның сөзінше, ауданда 50-ге жуық мектеп бар. Биыл мұнда 2 жаңа білім ошағы салынуда. Келесі жылы да осындай ғимарат тұрғызу жоспарланған. Сондай-ақ, тағы 4-еуі күрделі жөндеуден өткізілмек. Мемлекет көмегінің арқасында мектептердің жартысынан астамы жаңартылған.
Айта кетейік, Жетісу облысында білім беру инфрақұрылымын қолдау қоры мен арнайы мемлекеттік қор қаражатына 4 жаңа мектеп салынуда. Жалпы, оларды қаржыландырудың арқасында өңірде 20 млрд. теңгеге жуық сомаға 29 нысан бой көтеруде.
Айгүл БАЙБОСЫНОВА
