Армансыз адам – қанатсыз құс. Иә, мына өмірде армансыз адам жоқ шығар, сірә?! Ол – әр адамның қиялы мен қалауынан туған биік шың іспеттес. Болашағын арманымен байланыстыратын, әр сәті өзгеріп отыратын өмірдегі ынталандырушы күштің иелері бүлдіршін-бөбектер екені рас.
Бір жыл бұрын 25 жылдық тарихы бар «Жетісу» телеарнасында «Менің арманым» деп аталатын хабар жарыққа шықты. Бағдарлама – жүрегі таза, арманы асқақ, қиялы шексіз балаларға арналған хабар. Аталған бағдарлама барысында бүлдіршіннің өмірбаяны, қызығушылығы, жетістіктері баяндалды. Арна ұжымы кейіпкердің жүрек түкпіріндегі арманын орындап, балалардың қуанышына куә болды. Жоба продюсер Назгүл Аязбаеваның авторлығымен, редакцияға келіп түскен хат негізінде жүзеге асырылғанын айтып өткен жөн.
«Менің арманым» хабарының соңғы шығарылымы қорытынды кеш ретінде өтті. Жоба жетекшілері өткен шығарылымдағы барша арманы орындалған балалардың басын қосып, демеушілік көрсеткен жандарға Алғыс хат табыстады. Мерекелік бағдарламаның шырайын әнші Самат Жанғазин мен Руслан Сатай, Гүлнұр Нұрасылова мен «Бриллиант» би тобы кіргізді. Сондай-ақ, телеарна директоры Думан Алтынбекұлы арманшыл бүлдіршіндердің ішінен ең үздік деп танылған таланттарды марапаттады.
Кешті бағдарлама жүргізушісі Гүлнұр Тұрарова «Армандай біліп, сол арман-мұраттарға жету үшін талмай еңбек етіңіздер» деген сөзімен тамамдады.
А. ӘБІЛТАЙҚЫЗЫ
