Республика күні қарсаңында Талдықорғанда «AMANAT» партиясы жанындағы облыстық «Жастар рухы» жастар қанаты Мемлекеттік Туды насихаттауға арналған «Менің Елім – Менің Туым!» акциясын ұйымдастырды.
Акция барысында Талдықорған қаласындағы Салтанат сарайының алдында өлшемі 10х3 метр болатын облыстағы ең үлкен Ту ілінді. Іс-шараға жастар қанатының белсенділері мен еріктілер қатысып, мемлекеттік нышанға деген құрметті насихаттады.
Мемлекеттік рәміздерге құрметті арттырып, елдік бірлік пен патриоттық сезімді нығайтты. Акция аясында Туды көтеру рәсімі өткізіліп, қатысушыларға Көк байрақтың тарихы мен мағынасы түсіндірілді.
Облыстық «Жастар рухы» жастар қанатының төрағасы Қуаныш Сайлаубай Мемлекеттік Тудың тәуелсіздік пен ел бірлігінің белгісі екенін атап өтіп:
– Мемлекеттік Ту – біздің ортақ мақтанышымыз. Ол тәуелсіздігімізді тұтастығын, ұлттың рухын бейнелейді. Көк байрақ астында өмір сүріп, еңбек ету – әр азамат үшін үлкен мәртебе, – деді.
Ұйымдастырушылардың мәлімдеуінше, осындай патриоттық бағыттағы іс-шаралар алдағы уақытта өңірдің барлық аудандарында жалғасын табады.
Ал бұл бастама – елдік рухты оятқан айбынды көрініс. Сондай-ақ, осындай шаралар тәуелсіз Қазақстанның Көк туын әрбір жүректе желбіретіп, ұлттың ұлағатты ұстанымын ұрпақ санасына сіңіре берері ақиқат.
Санжар СҰЛТАНҒАЗЫ
