Бұл аумаққа майлы-дәнді, азықтық дақылдар, қант қызылшасы, бақша өнімдері мен көкөністер себіледі. Қазірдің өзінде 13500 гектарға ылғал жабылып, 21361 гектар тырмалау жұмысы аяқталған. Ал 47410 гектар жер жыртылған. Жаздық бидай, жаздық арпа, сұлы, күнбағыс, картоп, біржылдық шөп 100 пайыз себілсе, жоспары асыра орындалған қант қызылшасы 125 пайызға жетті. Ал қалған дақылдарды себу жұмысы жақын арада аяқталады.
Көктемгі дала жұмыстарын іркіліссіз жүргізуге қажетті дизель отын қорын дайындауға ерекше назар аударылған болатын. Осы мақсатта 21 шаруашылық 535 тоннаға өтінім беріп, бүгінде 11 шаруашылық 319 тоннаны алуға келісімшартқа отырып, оның 181,5 тоннасы сатып алыныпты. Дақыл өнімділігін арттыру мақсатында 4532 тонна минералды тыңайтқышты пайдалану жоспарланып, жыл басынан «Казфосфат», «КазАзот» серіктестіктерінен және сыртқы жеткізушілерден сатып алынған 3780 тонна минералды тыңайтқыш жеткізілуде.
Диқандардың көктемгі дала жұмыстары аясындағы қаржылық қиындығын шешу мақсатында «Алакөл» несие серіктестігі «Кең дала» және «Агробизнес» бағдарламасы бойынша 36 шаруа қожалығының жалпы көлемі 864,5 млн. теңгеге сұранысын қабылдаған. Осыған орай, «Кең дала 1» бағдарламасы бойынша 19 жобаға 275,2 млн. теңге, «Кең дала 2» бағдарламасы бойынша 15 жобаға 454,3 млн. теңге, «Агробизнес» бағдарламасы бойынша 2 жобаға 135 млн. теңге несие берілген.
Демек, Алакөл ауданындағы көктемгі дала жұмыстары тыңғылықты жүргізіліп, жоспарлы жұмыс атқаруда. Егер қуаңшылық киіп кетпесе диқандар күзде мол өнімге кенелмек.
Қажет Андас
