Үштөбедегі жұмысы тоқтап тұрған ұн комбинаты қайта жаңғыртылады. «АгроКомплексҮштөбе» ЖШС агро-өнеркәсіптік кешенді қалпына келтіру және жаңғырту жобасын іске асыруды жоспарлап отыр. Аудандық кәсіпкерлік бөлімінің ақпараты бойынша 12 миллиард теңге көлемінде инвестиция құйылатын жоба үш негізгі өндіріс кешенін іске қосуға мүмкіндік береді. Бұл аймақтық экономиканы жандандырып, 500-ден астам жаңа жұмыс орнын ашуға жол ашады.
Жобаның басты бағыты – ауыл шаруашылығы өнімдерін өңдеуге арналған үш түрлі өндіріс кешенін жаңғырту және қуаттылығын арттыру. Алғашқы кезеңде жылына 300 мың тонна құрамажем өндірісіне мүмкіндік беретін зауыт іске қосылады. Бұл биыл 4-тоқсанында жүзеге аспақ. Жаңа өндіріс 100-ге жуық жұмыс орнын құруды жоспарлап отыр. 2027 жылы 150 мың тонна май-тоңмай өндіретін зауыт іске қосылмақ. Жергілікті нарықтың сұранысын қанағаттандыруға және жаңа жұмыс орындарын ашуға ықпал етеді. Комбинаттың қуаттылығы жылына 150 мың тонна ұн өндіруге жетеді. Бұл алдағы жылы жүзеге асатын болады. Ұн тарту өндірісі тұралап қалған кәсіпорынның қуаттылығын қайта жандандырып, өңірдің азық-түлік қауіпсіздігін қамтамасыз етуге көмектеседі.
– Зауыт алғаш 1985 жылы салынған. Сол кезеңде нысан ауыл шаруашылығын дамытуға айтарлықтай үлес қосып, өңірде жоғары сапалы мал азығын өндірудің маңызды орталығына айналды. 2007 жылы ұн тарту комбинаты қосылып, тәулігіне 100 тонна ұн өндіріп, кәсіпорынның ауқымы кеңейді. Алайда 2015 жылы қаржылық қиындықтар мен басқа да себептерге байланысты ұн өндірісі тоқтап қалды. Зауыт банкке кепілге қойылып, одан кейінгі жылдары жұмысын доғарған еді, – дейді аудандық кәсіпкерлік және туризм бөлімінің басшысы Гауһар Байгазинова.
Жоба аясында 500-ден астам жаңа жұмыс орны ашылады. Бұл өз кезегінде Үштөбе қаласындағы жұмыссыздық деңгейін төмендетуге мүмкіндік береді. Жаңа жұмыс орындары қаланың тұрғындары үшін маңызды экономикалық мүмкіндік болмақ.
Қазіргі уақытта жобаның алғашқы кезеңі бойынша құрамажем өндірісіне қажетті құрылыс және жабдықтау жұмыстары жүргізілуде. Екінші және үшінші кезеңде май-тоңмай өндірісі мен ұн тарту комбинатының жаңғыртылуы жүзеге асады.
«АгроКомплексҮштөбе» ЖШС іске асыратын бұл ауқымды жоба өңірдің агроөнеркәсіптік әлеуетін арттыруға және экономикалық тұрақтылықты нығайтуға бағытталған маңызды қадам.
Гауһар МҰСА
