Шымкент қаласының қылмыстық істер жөніндегі мамандандырылған ауданаралық сотында қала әкімінің орынбасары Руслан Берденовке жасалған қастандыққа қатысты төртінші сот отырысы басталды, деп хабарлайды 7-su.kz ақпараттық порталы.
Отырыста жәбірленуші Руслан Берденов бейнебайланыс арқылы куәлік берді. Ол айтқандарын қажет болса, полиграф арқылы да дәлелдеуге дайын екенін жеткізді.
Берденов сотта күдікті Ернар Жиембаймен тек үш рет кездескенін атап өтті:
– «Екі рет ресми жағдайда жолықтым. Үшіншісінде ол маған оқ атты», – деді әкім орынбасары.
Ол алғашқы кездесуді толық сипаттап берді. «Тұрғын үй Шымкент» ЖШС директоры Ернар Жиембай кеңеске инспектормен бірге келген. Бірақ Жиембай мердігерлер, тендерлер мен жұмыс ауқымы туралы нақты ақпарат ұсынбаған. Инспектор оған сыбырлап бағыт беріп отырған. Осы кезде тараптар арасында сөз қайшылығы туындаған. «Мен: «Онда жұмыстан шығыңыз» дедім. Кездесу осымен аяқталды», – деді Берденов.
Оның айтуынша, бір аптадан соң инспектор Жиембайдың: «Мен не біреуді өлтіремін, не өзім өлемін» деген сөзін жеткізген. «Ол кезде бұл сөздерге қатты мән берген жоқпын», – деді ол.
Әкім орынбасары екінші кездесудің де жай-жапсарын баяндады. Жиембай өз өтінішімен келіп, жұмыстан бірден емес, бірнеше айдан кейін кетуді сұраған. Әңгіме жылы жағдайда өткен, тіпті Берденовті «отбасымен үлгі тұтатынын» айтқан. Әкім орынбасары сол кездесуде тек іскерлік этикетке қатысты ескерту жасағанын растады.
Берденов екі кездесуде де жанжал болмағанын, барлық сөйлесулер техникалық құралдар арқылы жазылғанын айтты. «Мұны полиграф арқылы да растауға дайынмын», – деді ол.
Айта кетейік, 2025 жылғы 21 сәуірде Шымкент қалалық әкімдігі ғимараты жанында Руслан Берденовке оқ атылып, ол жарақатпен ауруханаға жеткізілген. Қылмысқа әкімдікке қарасты серіктестік қызметкері күдікті деп танылды.
Бастапқыда оқиғаның себебі қызғаныш не әдепсіз қылық болуы мүмкін деген болжам айтылған. Кейін күдіктінің әйелі мен әкесі де мәлімдеме жасаған еді.
Берденов ісі бойынша сот процесі 28 шілдеде басталған. 13 тамызда өткен сот отырысында куәгер қызметтен босату жайын растады.
