Қазақстан мектептерінде жасанды интеллект бағытындағы білім беру мазмұны түбегейлі жаңартылып жатыр, – деп хабарлайды 7-su.kz ақпараттық порталы.
Еліміздің орта білім беру жүйесі заман талабына сай жаңа серпін алуда. Оқу-ағарту министрлігінің хабарлауынша, енді бастауыш сыныптардағы дәстүрлі «Цифрлық сауаттылық» пәні «Цифрлық сауаттылық және жасанды интеллект», ал 5-11 сыныптардағы «Информатика» пәні «Информатика және жасанды интеллект» болып өзгертіледі. Мұндай маңызды қадам Мемлекет басшысы Қасым-Жомарт Тоқаевтың 2025 жылғы республикалық педагогтердің тамыз кеңесінде берген тапсырмасына сәйкес жүзеге асып келеді. Осылайша, 2025 жылдың қыркүйегінен басталған реформа кезең-кезеңімен өз нәтижесін беруге жақындады.
Жаңашылдықтың заңнамалық негізі де берік бекітілді. 2025 жылғы қарашада «Жасанды интеллект туралы» заң қабылданса, 2026 жылғы мамырда орта білім жүйесіне осы технологияларды енгізу жөніндегі Президент Жарлығы күшіне енді. Осы құжаттар аясында мемлекеттік жалпыға міндетті білім беру стандарты мен үлгілік оқу жоспарлары қайта қаралып, оқу бағдарламаларына жалпы 43 жаңа оқу мақсаты қосылды.
Өзгеріс тек атаудың ауысуымен шектелмейді, білім беру тереңдігін арттырады. Бастауыш 1-4 сынып оқушылары «Медиасауаттылық және жасанды интеллект» бөлімі бойынша 17 оқу мақсатын меңгеріп, цифрлық қауіпсіздік пен жеке деректерді қорғау негіздерін оқиды. Орта буындағы 5-9 сынып оқушылары үшін 14 оқу мақсаты қарастырылған. Онда балалар жасанды интеллект құралдарына дұрыс сұраныс (prompt) құрастыруды, ақпаратты сыни бағалауды және киберқауіпсіздікті үйренеді. Ал 10-11 сыныптағы жоғары сынып оқушылары «Деректерді басқару және жасанды интеллект» бағытындағы 12 оқу мақсаты аясында машиналық оқыту, нейрондық желілер, деректерді талдау мен қолданбалы криптография сияқты күрделі ұғымдарды меңгереді. Жаңа бағдарламалар 2025-2026 оқу жылында апробациядан сәтті өтіп, оң сараптамалық қорытынды алды. Қазіргі уақытта мұғалімдер үшін әдістемелік ұсынымдар әзірленуде.
