Қазақстан Республикасының қорғаныс министрі Руслан Жақсылықов Жетісу және Алматы облыстарына арнайы жұмыс сапарымен келді.
Сапар барысында Руслан Фатихұлы Қонаев, Талдықорған қалалары аумағында орналасқан әскери гарнизондардың оқу-жаттығу алаңдарын, инфрақұрылымдарын, ғимараттар мен оларды жөндеу жұмыстарының сапасын тексерді. Қорғаныс басшысы алдымен Қонаев шаһары аумағындағы «Шошқалы» әскери оқу полигонында болып, ондағы десанттық-шабуылдаушы әскери қызметшілердің оқу және бақылау атыс жаттығуларын орындау сәтімен танысты. Әрі дрон трассасын тексеріп, әскери қызметшілердің дрондарды анықтау және оларды жою әдістерін қолдана білуін қадағалады. Сонымен қатар, генерал өңірдегі арнайы операция күштерін даярлау орталығының, РХБҚ базасының, десанттық-шабуылдау бригадасының және басқа да әскери бөлімдердің жай-күйін зерделеді.
Аталған аймақтағы медициналық ғимараттың құрылыс жұмысы мен модульдік конструкцияларды қолдананып салынған казармаларды көзбен көріп шыққан қорғаныс генерал-полковнигі жауаптыларға қолға алынған әрбір істің сапалы әрі межелі мерзімде толық аяқтауға баса мән беруді тапсырды.
Осыдан соң Руслан Жақсылықов Жетісу жеріндегі парашютпен секіруге арналған әуе-десанттық кешені бар оқу алаңына ат басын бұрып, казармалардың қал жағдайына да көбен көрді. Ондағы еліміздің әр аймағынан шақырылған сарбаздармен емен-жарқын әңгімелесіп, қал жағдайларын білді. Сондай-ақ, тігін және әр түрлі аспаптар шеберханасын аралап, әуе-десанттық техниканы өндіру мен күтіп-ұстау бөлшектерінің жұмысын нақтылады.
Сапар қорытындысында Қорғаныс министрі аймақтағы жергілікті әскери бөлім қолбасшыларына жеке құрамның жауынгерлік даярлығының сапасын қамтамасыз етуге, әскери инфрақұрылымды жетілдіруге және мерзімді әскери қызметшілерінің әлеуметтік-тұрмыстық жағдайын жақсартуға бағытталған бірқатар тың міндеттер жүктеді.
Айдын КӘЛІМХАН
