Б. Құранбек атындағы Журналистер үйінде облыстық төтенше жағдайлар департаментінің мамандары таулы-орманды жерлерде өрттің алдын алу мәселесіне арнап мәслихат өткізді. Жиында облыстық ТЖД мемлекеттік өрт бақылау басқармасының аға инженері Еламан Аубакиров баяндама жасап, қолға алынған шаралар жайында кеңінен мәлімет берді.
Маманның айтуынша, жыл сайынғы өрт қаупі кезеңінен өту мәселелері департаменттің тұрақты бақылауында. Табиғи өрттердің алдын алу мақсатында облыс аумағында кезең-кезеңімен арнайы жоспар жүзеге асырылып келеді. Атап айтқанда, табиғи өрттерді ерте анықтау үшін «Қазақстан Ғарыш Сапары» АҚ-ның ғарыштық мониторингі, бейнебақылау жүйесі және пилотсыз ұшу аппараттары (ПҰА) кеңінен қолданылуда.
Сонымен қатар, елді мекендер маңындағы аумақтарды жанғыш қалдықтардан тазарту, құрғақ шөптерді ору, минералданған жолақтарды қалпына келтіру жұмыстары жүйелі жүргізілуде. Биылдың өзінде 1939,5 шақырым минералды жолаққа күтім жасалып, жаңа жолақтар салу жұмыстары толығымен орындалды. Өрт қауіпсіздігін сақтау мақсатында жалпы саны 358 ескерту берілген.
Аймақта төтенше жағдайлар кезінде әрекет етуге арналған 3098 адамнан құралған арнайы күштер мен 529 техника бірлігі дайын тұр. Бұдан бөлек, 115 ерікті өртке қарсы құрылым және 49 өрт сөндіру бекеті жасақталған. Бұл құрылымдарда 798 өрт сөндіру техникасы мен 2000-нан астам жұмысшы бар.
Халық арасында түсіндіру және алдын алу шаралары да назардан тыс қалмаған. Арнайы құрылған мобильді топтар (22 топ, 120 қызметкер) тарапынан 799 рейд жүргізіліп, 69 азамат әкімшілік жауапкершілікке тартылған. Оның ішінде 37 адамға ескерту берілсе, 32 тұлғаға жалпы сомасы 1 млн. 120 мың теңгеден астам айыппұл салынған.
Ауыл шаруашылығы тауарын өндірушілермен, шаруа қожалықтарымен және тұрғындармен бірлесіп 56 «дөңгелек үстел», 536 жиын, 788 нұсқама өткізілді. Бұл іс-шаралар барысында 14 мыңнан астам адам қамтылды.
Өрт қауіпсіздігін сақтау жөніндегі ақпараттық-түсіндіру жұмыстары да кең ауқымда жүргізілуде. Егін жинау кезеңінде және орман-дала алқаптарында сақтық талаптарын сақтау бойынша бұқаралық ақпарат құралдарында 2027 рет түсіндірме жұмыстары жүргізілген. Оның ішінде: теледидарда 12, баспасөз бетінде 177, радиода 135, әлеуметтік желіде 1703 жарияланым жарық көрді.
Қабылданып жатқан кешенді шаралар табиғи өрттердің алдын алуға, халықтың қауіпсіздігін қамтамасыз етуге бағытталған. Бұл бағыттағы жұмыстар өңірлік департаменттің тұрақты назарында қала бермек.
Санжар СҰЛТАНҒАЗЫ
