Орталық сайлау комиссиясының мүшесі Азамат Айманакумов Талдықорған, Текелі қалалары және Ескелді ауданы сайлау учаскелерінің дайындық барысымен танысты. Инспекциялық сапар барысында бірқатар сайлау учаскесін аралап, учаскелік сайлау комиссиялары мүшелеріне арналған оқу семинарына қатысты.
«Барлық сайлаушыларды сайлау науқаны туралы жан-жақты ақпараттандыру, учаскелік сайлау комиссиялары мүшелерін даярлау қажет. Сондай-ақ сайлаушылар, байқаушылар мен бұқаралық ақпарат құралдары өкілдері үшін қажетті жағдай жасау мәселелеріне ерекше назар аударылуы тиіс. Бұған қоса мүгедектігі бар адамдардың сайлау құқықтарының толық қамтамасыз етілуі аса маңызды», – деді Азамат Айманакумов.
ОСК мүшесі Азамат Айманакумов Жетісу облысы мемлекеттік органдары басшыларының қатысуымен кеңес өткізді. Сайлауға дайындық жұмыстарының барысы туралы Жетісу облыстық аумақтық сайлау комиссиясының төрағасы, жергілікті атқарушы және құқық қорғау органдарының басшылары баяндама жасады.
Жетісу облысында Құрылтай депутаттарының сайлауын өткізу үшін 479 сайлау комиссиясы жұмылдырылған.
Оның ішінде: 2989 комиссия мүшесі жұмыс істейді: 77 аумақтық, 2912 учаскелік комиссиялар.
Өңір бойынша сайлаушылар саны 441 941 адамды құрайды (2026 жылғы 1 қаңтармен салыстырғанда 1156 адамға көбейді).
Кездесулер барысында сайлаушыларды сайлау науқаны туралы жүйелі түрде ақпараттандырудың, дауыс берушілерге, сенім білдірілген адамдарға, байқаушыларға және бұқаралық ақпарат құралдарының өкілдеріне қажетті жағдай жасаудың маңыздылығына ерекше назар аударылды.
Өңірдегі мемлекеттік органдар өкілдерінің қатысуымен өткен кеңесте Құрылтай депутаттарының алдағы сайлауына дайындық барысы туралы ақпараттар ұсынылды. Азамат Айманакумов кеңеске қатысушылардың назарын сайлауды қатаң түрде сайлау заңнамасының талаптарына сәйкес өткізу, сайлау процесінің барлық кезеңінде жариялылықты, ашықтықты және қоғамдық қауіпсіздікті қамтамасыз ету қажеттігіне аударды.
