Бұл туралы 7-su.kz ақпараттық порталы Ақорда сайтына сілтеме жасап хабарлайды.
Салтанатты рәсім барысында Президент қайраткерді 80 жасқа толған мерейтойымен құттықтап, оның мемлекет қалыптастыру ісіне қосқан елеулі үлесін атап өтті.
– «Тәуелсіздіктің алғашқы күндерінен бастап ел ісіне белсене атсалыстыңыз. Мемлекеттігіміздің тұғырын нығайту жолында аянбай еңбек еттіңіз. Сіз елімізде парламентаризм институтын дамытуға, заң шығару ісіне, дипломатиялық қарым-қатынастарды нығайтуға орасан үлес қостыңыз. Мемлекетшіл болмысыңыз бен адамгершілігіңіз бүгінгі жастарға үлгі», – деді Қасым-Жомарт Тоқаев.
Президент Сұлтановтың ұзақ жылдар бойы атқарған лауазымдарын еске сала отырып, оның Премьер-министрдің орынбасары, министр, Жоғары Кеңес Төрағасының орынбасары, бірнеше рет Мәжіліс пен Сенат депутаты болғанын, сондай-ақ Қытайдағы елшілік қызметі кезінде елдің сыртқы саясатында маңызды рөл атқарғанын ерекше атап өтті.
Сонымен қатар Мемлекет басшысы қайраткердің жазушылық еңбегіне де тоқталып, саяси және қоғамдық үдерістерге арналған бірқатар маңызды еңбектердің авторы екенін айтты.
Өз кезегінде Қуаныш Сұлтанов көрсетілген құрмет пен жоғары награда үшін Президентке алғысын білдіріп, бұл марапатты ел игілігі жолындағы еңбегіне берілген баға ретінде қабылдайтынын жеткізді.
