«Жол азабы – көр азабы» дейді халқымыз. Сапалы жол – тұрғындардың қауіпсіз қатынасының кепілі, аймақтың әлеуметтік-экономикалық дамуына серпін беретін маңызды инфрақұрылым. Облыста бұл бағыттағы жұмыстар жүйелі жалғасып, ел игілігіне арналған жобалар кезең-кезеңімен жүзеге асырылуда. Соның бірі – облыстық маңызы бар Қабанбай – Лепсі автомобиль жолын орташа жөндеу.
Жоба облыстық жолаушылар көлігі және автомобиль жолдары басқармасының тапсырысы негізінде 2025-2026 жылдарға жоспарланған. Жөндеу жұмыстары жолдың 20-40 шақырым аралығын, яғни жалпы ұзындығы 20 шақырым болатын учаскені қамтиды.
Жобаның жалпы құны 1 млрд. 16 млн. теңгені құрайды. Оның ішінде 2025 жылы 716 млн. 983 мың теңге игеріліп, жоспарланған 15 шақырым жол толықтай орташа жөндеуден өтті. Нәтижесінде жол жабыны жаңартылып, көлік қозғалысының қауіпсіздігі артып, тұрғындардың қатынауына қолайлы жағдай жасалды.
Алакөл ауданының тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы Еркебұлан Тұрғановтың айтуынша, биыл жобаны толық аяқтау үшін 299 млн. 141 мың теңге бөлінді. Осы қаражат есебінен қалған 5 шақырым жол учаскесіне орташа жөндеу жүргізілді. Қазіргі таңда жол жиегін нығайту жұмыстары жалғасуда. Бұл жұмыстар жолдың беріктігін арттырып, ұзақ жыл бойы сапалы пайдалануға мүмкіндік береді.
Жөндеу жұмыстарын «Абз Карьер ДРСУ» жауапкершілігі шектеулі серіктестігі атқаруда. Мердігер мекеме бекітілген кестеге сәйкес құрылыс қарқынын бәсеңдетпей, жұмысты жоспарлы түрде жүргізіп келеді.
Жауапты мекеменің мәліметінше, нысандағы барлық жұмысты аяқтап, пайдалануға беру осы жылдың шілде айының соңына жоспарланған.
Жаңарған Қабанбай – Лепсі автомобиль жолы тұрғындардың жүріп-тұруын жеңілдетіп қана қоймай, елді мекендер арасындағы байланысты нығайтып, жүк және жолаушылар тасымалының тиімділігін арттыруға, сондай-ақ, өңірдің туристік әлеуетінің дамуына оң ықпал етеді. Бұл – халықтың тұрмыс сапасын жақсартуға бағытталған нақты істің нәтижесі, облыстың өркендеуіне жасалған маңызды қадам.
Санжар СҰЛТАНҒАЗЫ
Лепсі ауылы,
Алакөл ауданы
