Қазақстанда жоғары білім алуды жоспарлап жүрген талапкерлер үшін мемлекеттік тапсырыстың бөліну бағыттары айқындалды. Ғылым және жоғары білім министрі Саясат Нұрбек еңбек нарығындағы кадр тапшылығы мен грантқа түсу мүмкіндігі жоғары салаларды атап өтті, – деп хабарлайды 7-su.kz ақпараттық порталы.
Бүгінде елімізде техникалық және ауыл шаруашылығы бағыттары бойынша маман тапшылығы қатты сезіледі. Министрдің айтуынша, жылу энергетикасы саласына деген қызығушылық соңғы жылдары арта бастаған. Егер үш жыл бұрын бұл мамандыққа небәрі 8 адам құжат тапсырса, 2025 жылы өтініш берушілер саны 320-дан асқан. Дегенмен, энергетика, ветеринария, мал шаруашылығы және өсімдік шаруашылығы секілді стратегиялық маңызды салаларда әлі де бос орындар жеткілікті.
Бұл бағыттарды таңдаған жастардың грант иегері атану ықтималдығы өте жоғары. Себебі мемлекет тарапынан бөлінетін қаржы көлемі қомақты, ал үміткерлер саны салыстырмалы түрде аз. Сондай-ақ су шаруашылығы, өнеркәсіптік құрылыс, көлік және логистика салалары да кадрларға зәру.
Технологияның қарыштап дамуы жаңа мамандықтарға жол ашты. Саясат Нұрбектің айтуынша, алдағы уақытта ядролық физика, атом нысандарын басқару, ұшқышсыз ұшу аппараттары мен дрондар жүйесін меңгерген мамандар ең жоғары сұранысқа ие болады. Бұл салалар тек технологиялық емес, сонымен қатар экономикалық тұрғыдан да тиімді.
Министрлік стипендияны арттыру арқылы емес, мамандықтың беделі мен болашақ жалақы көлемін жақсарту арқылы жастарды тартуды көздеп отыр. Қазіргі уақытта энергетика компаниялары жалақы нормативтерін көтеруді бастап кетті, бұл түлектер үшін жақсы мотивация болмақ.
Білім беру саласындағы тағы бір маңызды жаңалық – мемлекеттік гранттардың бөліну географиясы өзгереді. Бұған дейін негізгі тапсырыс Алматы қаласындағы оқу орындарына берілсе, енді басымдық өңірлік университеттерге берілмек.
-
Қарағанды;
-
Павлодар;
-
Шығыс Қазақстан облыстарының жоғары оқу орындарына гранттар көбірек бөлінеді.
Бұл қадам түлектердің оқу бітірген соң өндірістік аймақтарда қалып, еңбек етуіне жағдай жасайды. Егер сіз оқуға түсуді және жұмыссыз қалмауды ойласаңыз, осы өңірлердегі техникалық бағыттарды қарастыруды ұсынамыз.
