«Таза Қазақстан» республикалық экологиялық акциясы аясында Қаратал ауданында қоршаған ортаны қорғауға бағытталған іс-шара өтті. Экологиялық мәдениетті қалыптастыруды мақсат еткен науқан барысында өзен жағалауы тұрмыстық қалдықтардан толық тазартылды, – деп хабарлайды 7-su.kz ақпараттық порталы.
Қаратал өзенінің Алмалы ауылы маңындағы аумағын тазалауға Үштөбе орман шаруашылығының Қаратал орманшылығы, Жануарлар дүниесін қорғау жөніндегі жедел қызмет, Балқаш-Алакөл облысаралық бассейндік балық инспекциясының Қаратал инспекциясы және Жетісу облысы Полиция департаментінің табиғат қорғау тобының қызметкерлері атсалысты. Біріккен топ мүшелері қоршаған ортаны қорғау және табиғи аумақтардың тазалығын сақтау бойынша ауқымды жұмыстар атқарды.
Шара барысында арнайы қызмет өкілдері демалушылар мен жергілікті тұрғындарға экологиялық жауапкершілік туралы түсіндірді. Су айдындарын ластамау, қоқысты арнайы белгіленген орындарға тастау және табиғатқа ұқыпты қарау қажеттігі айтылды. Мұндай акциялар қоғамның табиғатқа деген көзқарасын өзгертіп, таза ортаны сақтауға жұмылдырады.
Жетісу облысындағы экологиялық мәдениетті дамыту мен тазалықты сақтау – басты басымдық. Атқарылған жұмыстар нәтижесінде Алмалы ауылы маңындағы өзен жағалауы жаңғырып, көріктене түсті. Экологиялық ахуалды жақсарту мақсатындағы ұйымдастырушылық іс-шаралар тұрақты негізде жалғасады.
Қоршаған ортаның тазалығы – әр азаматтың ортақ парызы. Табиғатқа жанашырлық таныту, ластамау және өңірдегі экологиялық жағдайды жақсарту – ұрпақ алдындағы міндет.
