Бұл туралы 7-su.kz ақпараттық порталы Massaget.kz сайтына сілтеме жасап хабарлайды.
Мәжіліс депутаты Нұртай Сабильяновтың айтуынша, 2023 жылғы желтоқсан айында Қазақстан мен ХҚДБ арасында республиканың инклюзивті экономикасын жедел цифрландыру жобасы аясында қарыз алу туралы келісімге қол қойылған.
«Келісімнің мақсаты – Қазақстанның шалғай және жеткіліксіз қамтылған аудандарында тұратын ауыл тұрғындарын сапалы және тұрақты кеңжолақты байланыс инфрақұрылымымен қамтамасыз етуге бағытталған жобаны іске асыру үшін қарыз алу», – деп түсіндірді Нұртай Сабильянов.
Мәжіліс кулуарында журналистер депутаттан нақты қандай сома туралы сөз болып отырғанын сұрағанда, ол былай деп жауап берді:
«Қазақстан мен Халықаралық қайта құру және даму банкі арасында 13 миллиард жапон иені мөлшерінде қарыз беру туралы келісімге қол қойылды. Бұл шамамен 46 миллиард теңгеге тең».
Қарыздың мерзімі – 12 жыл. Қаржы шалғай елді мекендерге сапалы интернет желісін тартуға және байланыс инфрақұрылымын жетілдіруге бағытталмақ.
«Инфрақұрылымды қалпына келтіру, халықтың ақпарат алуына жағдай жасау, жақсы байланыс пен жылдам интернетке қол жеткізу – бұл жоба көздеген негізгі мақсаттар», – деді мәжілісмен Сабильянов.
Анықтама үшін:
Халықаралық қайта құру және даму банкі (ХҚДБ) – Дүниежүзілік банктің негізгі несиелік ұйымы, БҰҰ-ның мамандандырылған мекемесі. Ол 1944 жылы Халықаралық валюта қорымен бірге құрылған мемлекетаралық инвестициялық институт болып саналады.
21 мамырдағы ресми деректерге сәйкес, жапон иенінің бағамы – 3,54 теңге. Осы бағамға сәйкес, 13 миллиард иен көлеміндегі қарыз теңгеге шаққанда 46 миллиард шамасында болып отыр.
Жобаның жүзеге асуы еліміздің ауылдық өңірлеріндегі цифрлық теңсіздікті азайтуға, білім, денсаулық сақтау және мемлекеттік қызметтерге қолжетімділікті арттыруға мүмкіндік береді деп күтілуде.
