Париж қаласында Экономикалық ынтымақтастық және даму ұйымының (ЭЫДҰ) «Жасыл» іс-қимылдар жөніндегі арнайы жұмыс тобының (Green Action Task Force, GATF) маңызды отырысы өтті. Аталған халықаралық шараға Қазақстан Республикасының ресми делегациясы қатысып, елдің экологиялық саясаты мен «жасыл» экономикаға көшу бағытындағы негізгі жетістіктерін таныстырды, – деп хабарлайды 7-su.kz ақпараттық порталы.
Отандық делегация құрамында ҚР Экология және табиғи ресурстар министрлігінің Климаттық саясат департаментінің директоры Сәуле Сабиева, ҚР Ұлттық экономика министрлігінің Халықаралық экономикалық ынтымақтастық департаментінің директоры Ержан Несібқұлов, сондай-ақ «Астана» халықаралық қаржы орталығы мен Қазақстанның Париждегі халықаралық ұйымдар жанындағы Тұрақты өкілдігінің лауазымды тұлғалары болды. GATF Орталық Азия мен Шығыс Еуропа елдерінде экологиялық саясатты ілгерілетуге арналған негізгі халықаралық алаң болып табылады. Жиын барысында отандық өкілдер Астана қаласында жоғары деңгейде өткен Өңірлік экологиялық саммиттің нәтижелерін баяндап, ЭЫДҰ басшылығына мазмұнды қолдау көрсеткені үшін алғыс білдірді.
Сәуле Сабиева жасыл экономиканы жоспарлау мәселелеріне арналған дөңгелек үстелде сөз сөйлеп, Қазақстандағы көміртегі бейтараптығына қол жеткізу стратегиясы мен елдің басымдықтарын ортаға салды. Өз кезегінде Ержан Несібқұлов Орталық Азиядағы тұрақты инфрақұрылымды дамыту (SIPA) бағдарламасын іске асыру тәжірибесімен бөлісті. Ол SIPA командасының қолдауымен Қазақстанның 2060 жылға дейінгі төмен көміртекті даму стратегиясының жобасы әзірленіп жатқанын және «жасыл» жобаларға инвестиция тарту тетіктерін жетілдіру жұмыстары жүріп жатқанын жеткізді.
Талқылау барысында Ұлттық іс-қимыл жоспарының өзекті бағыты ретінде су секторына ерекше назар аударылды. Қазақстан тарапы бұл салада халықаралық тәжірибені зерделеуге және су ресурстарын тұрақты басқару бойынша әріптестермен тәжірибе алмасуға ниетті екенін мәлімдеді. Ауқымды отырыстың қорытындысы бойынша ҚР Экология және табиғи ресурстар вице-министрі Мансұр Ошурбаев 2027-2028 жылдарға арналған GATF бюросы төрағасының орынбасары болып сайланды. Сапар аясында отандық өкілдер ЭЫДҰ Даму орталығының және Еуразиялық бәсекеге қабілеттілік бағдарламасының басшылығымен екіжақты кездесулер өткізіп, бірлескен жобаларды жүзеге асыру перспективаларын нақтылады.
