Халықаралық World Justice Project (WJP) ұйымы жариялаған жаңа зерттеуде Қазақстан қоғамдық тәртіп пен қауіпсіздік деңгейі бойынша әлемдегі ең қауіпсіз 50 елдің қатарына енді. 143 мемлекет пен аумақтың арасында еліміз 41-орынға жайғасып, өз позициясын тағы да жақсартты, – деп хабарлайды 7-su.kz ақпараттық порталы.
Еліміз бұл бағытта Франция, Италия, Португалия, Түркия және Грузия сияқты дамыған мемлекеттерді басып озды. Сарапшылардың айтуынша, соңғы жылдары қабылданып жатқан цифрлық бақылау, көшедегі бейнекөзге түсіру жүйелерін кеңейту және құқық қорғау органдарының жедел әрекет етуі қылмыс деңгейін төмендетуге оң ықпал етуде.
Еліміз қоғамдық қауіпсіздік индикаторы бойынша тұрақты түрде ілгерілеп келеді. Деректерге сүйенсек, 2023 жылы Қазақстан 44-орында болса, 2024 жылы 43-орынға, ал 2025 жылы 42-сатыға жайғасқан еді. Биылғы жылғы 41-орын саяси және әлеуметтік тұрақтылықтың айқын нәтижесін көрсетеді.
WJP сарапшылары қоғамдық қауіпсіздікті бағалау кезінде мынадай негізгі критерийлерге сүйенеді:
-
Қылмыс деңгейі: Азаматтардың мүлкіне немесе өміріне қастандық жасау қаупінің төмендігі.
-
Терроризм мен қарулы қақтығыстар: Ішкі және сыртқы қауіп-қатерлердің болмауы.
-
Зорлық-зомбылықсыз орта: Жеке жанжалдар мен тұрмыстық дауларды заң жүзінде шешу мүмкіндігі.
Мұндай оң өзгерістер тек тұрғындардың жайлылығын арттырып қана қоймай, елімізге келетін шетелдік инвесторлар мен туристердің сенімін арттыруға тікелей әсер етеді.
Қоғамдық қауіпсіздік – World Justice Project ұйымының жалпы Құқық үстемдігі индексінің (Rule of Law Index) сегіз негізгі факторының бірі ғана. Бұл зерттеуде азаматтардың негізгі құқықтары, сот жүйесінің ашықтығы, сыбайлас жемқорлық деңгейі және мемлекеттік органдардың заңды сақтауы кешенді түрде бағаланады.
Жалпы Құқық үстемдігі индексінде Қазақстан 143 елдің ішінде 67-орынға тұрақтады. Ал жаһандық көшбасшылар қатарында Дания, Норвегия, Финляндия, Швеция және Люксембург тұр.
Қауіпсіздікті әрі қарай нығайту үшін елімізде құқықтық сауаттылықты арттыру, полиция қызметінің сервистік форматын дамыту және азаматтық қоғаммен белсенді диалог орнату жұмыстары жалғасуда. Қауіпсіз орта – әрбір азаматтың жауапкершілігі мен заңға деген құрметінен басталады. Бұл бағыттағы оң нәтижелер мемлекет пен қоғамның бірлескен жұмысының жемісі екені анық.
