Қазақстанда ұлы ақын, ағартушы Абай Құнанбайұлының 180 жылдығы кең көлемде аталып өтуде. Осыған орай Ұлттық статистика бюросы ақын есіміне байланысты ресми мәліметтерді жариялады, деп хабарлайды 7-su.kz ақпараттық порталы.
Абай есімімен 18 763 адам тіркелген
Ресми деректерге сәйкес, елімізде Абай есімді 18 763 азамат тұрады. Бұл есім иелерінің ең көбі келесі өңірлерде тіркелген:
-
Астана қаласы – 2 089 адам;
-
Түркістан облысы – 2 018 адам;
-
Алматы қаласы – 1 719 адам.
Абай есімі ең жиі қойылған жас тобы – 30-34 жас аралығындағы азаматтар, олардың саны – 3 228. Сондай-ақ 2025 жылдың алғашқы жартыжылдығында дүниеге келген 157 нәрестеге Абай есімі берілген.
Ең егде Абай – 1932 жылғы азамат
Ұлттық статистика бюросының мәліметінше, Абай есімін иеленген ең егде тұрғын – 1932 жылы туған.
Абай есімі қыз балаларға да берілген
Ресми дерекке сәйкес, елімізде Абай есімді 10 әйел де тіркелген. Бұл есімнің сирек болса да қыз балаларға қойылғаны байқалады.
Ибраһим есімімен – 35 мыңнан астам адам
Абай Құнанбайұлының шын есімі – Ибраһим. Қазіргі таңда Ибраһим, Ибрагим, Ибрахим нұсқаларымен аталатын азаматтардың жалпы саны – 35 404 адам.
Абай есімімен аталған елді мекендер
Ұлы ақынның есімі тек азаматтарға ғана емес, географиялық атауларға да берілген. Республика бойынша:
-
1 облыс (Абай облысы);
-
1 қала (Абай қаласы, Қарағанды облысы);
-
3 аудан;
-
26 ауыл – Абай Құнанбайұлының есімімен аталған.
Аталған ресми деректер Абай Құнанбайұлының рухани мұрасы мен есімінің халық арасында кеңінен танылып, ұлт жады мен күнделікті өмірде ерекше орын алатынын айқын көрсетеді.
