2024 жылғы 1 маусымнан бастап Қазақстанда босану, акушерлік операциялар, салмағы аз жаңа туған сәбилерді күтіп-баптау және педиатриялық қызметтер бойынша тарифтер көтерілді, – деп хабарлайды 7-su.kz ақпараттық порталы.
Бұл туралы ҚР Денсаулық сақтау министрі Ақмарал Әлназарова мәлімдеді. Министрдің айтуынша, ауыр диагнозы бар әйелдерге жасалатын кесар тілігі операциясының құны 323 мың теңгеден 440 мың теңгеге дейін өскен. Бұл – 36 пайыздық өсім.
Осы мақсаттарға қосымша 20 миллиард теңге бөлінді. Министрдің айтуынша, бұл қаражат медициналық ұйымдардың нақты шығындарын өтеуге, кредиторлық берешекті азайтуға, қымбат дәрілік заттарға қолжетімділікті арттыруға, сондай-ақ тәжірибелі мамандарды ұстап қалуға мүмкіндік берген.
Медициналық авиация желісі арқылы дер кезінде көмек көрсету шаралары әйелдер мен балалардың 96 пайызын аман алып қалуға мүмкіндік берді.
2024 жылдан бастап босандыру және балалар ұйымдарын жабдықтау деңгейі 87 пайызға жетті, ал медициналық техниканың тозуы 37 пайызға дейін төмендеді.
Бұған дейін «Курсив» басылымы қазақстандық әйелдердің ақылы босануға бірнеше миллион теңгеге дейін қаражат жұмсайтынын жазған болатын.
