2026 жылы Қазақстанда коммуналдық қызмет тарифтері орта есеппен 20-30%-ға қымбаттайды. Бұл туралы Ұлттық экономика министрлігінің Табиғи монополияларды реттеу комитетінің төрағасы Тимур Қосымбаев Үкіметте өткен брифинг барысында мәлімдеді, деп хабарлайды 7-su.kz ақпараттық порталы.
Комитет басшысының айтуынша, тарифтердің күрт өсуіне жол бермеу үшін ұлттық жоба аясында арнайы тежеу тетігі енгізілген. Бұл механизм мемлекеттік субсидиялар арқылы жүзеге асады.
– Инфрақұрылымды жаңғыртуға бағытталған инвестициялар екінші деңгейлі банктер, «Бәйтерек» холдингі, Қазақстанның Даму Банкі (ҚДБ), сондай-ақ бюджет және халықаралық қаржы ұйымдарының несиелері арқылы қаржыландырылады. Ал негізгі қарыз бен пайыздық мөлшерлеменің бір бөлігі тарифке қосылады, – деді Қосымбаев.
Оның айтуынша, тариф құрамына несие бойынша 10% сыйақы мөлшерлемесі ғана енгізіледі, ал қалған бөлігі республикалық бюджет есебінен субсидияланады.
– Үкімет тарифтердің шектен тыс өсуінің алдын алу мақсатында пайыздық мөлшерлеменің қалған бөлігін мемлекет есебінен өтейді. Осылайша тарифтердің орташа жылдық өсімі 20–30% шамасында болады, – деп нақтылады комитет төрағасы.
Бұған дейін Үкімет үйінде өткен брифингте жылу маусымына дайындық жұмыстары да сөз болды. Сонымен қатар Премьер-министрдің орынбасары Қанат Бозымбаев коммуналдық төлемдер қымбаттаған жағдайда әлеуметтік осал топтарға мемлекет тарапынан көмек көрсетілетінін атап өткен болатын.
