Қазақстанда әуе отыны бағасының төмендеуіне байланысты жақын арада әуе билеттерінің құны арзандайды, – деп хабарлайды 7-su.kz ақпараттық порталы.
Мемлекет басшысы Қасым-Жомарт Тоқаевтың тапсырмасы бойынша елдің транзиттік әлеуетін арттыру мақсатында авиакеросин бағасын кезең-кезеңімен төмендету жұмыстары басталды. Бұл шара отандық авиация саласын дамытуға және халықаралық тасымалдаушылар үшін Қазақстан аспанын тартымды етуге бағытталған.
Көлік министрі Нұрлан Сауранбаевтың айтуынша, ұшу шығындарының 40%-ы тікелей әуе отынының құнына тәуелді. Бұған дейін еліміздегі әуежайларда отын бағасы тоннасына 1200-1300 доллар болса, қазіргі таңда бұл көрсеткіш 940 долларға дейін түсті.
«Біз транзиттік мүмкіндіктерімізді монетизациялау үшін әуежайларда арзан әуе отыны болуы керек. Бағаны тағы да 100 долларға түсіру жоспары бар. Отын арзандаса, сәйкесінше әуе билеттерінің бағасы төмендейді, логистика жеңілдейді», – деп атап өтті министр.
Энергетика министрі Ерлан Ақкенженовтің мәлімдеуінше, авиаотын бағасының 1200 доллардан 940 долларға дейін арзандауы оң нәтиже бере бастады. Алдағы уақытта бағаны 890 долларға дейін жеткізу көзделуде. Мұндай қадамдар «Air Atlanta», «Hungary Airlines», «One Air» секілді халықаралық ірі авиакомпаниялардың Қазақстан арқылы рейстер санын көбейтуіне мүмкіндік берді.
Бұл өзгерістер тек бағаның арзандауына ғана емес, сонымен қатар еліміздің авиациялық хаб ретіндегі позициясын нығайтуға септігін тигізеді. Монополияның жоқтығы және еркін бәсекелестік ортаның қалыптасуы жолаушылар үшін сапалы қызмет пен тиімді тарифтерді қамтамасыз етеді.
Еске сала кетейік, Ұлттық құрылтай отырысында Мемлекет басшысы Қасым-Жомарт Тоқаев авиакеросин бағасының көрші елдермен салыстырғанда тым қымбат екенін қатаң сынаған болатын. 100 млн. тонна мұнай өндіретін ел бола тұра, отын бағасының жоғары болуы ақылға сыймайтын жағдай екенін айтқан Президент, бұл мәселені тез арада шешуді тапсырды.
Бүгінгі таңда атқарылып жатқан жұмыстар сол тапсырманың нақты нәтижесі. Отын бағасының тұрақтануы тек әуе билеттерінің арзандауына ғана емес, ел экономикасының логистикалық мүмкіндіктерін кеңейтуге де оң әсер етеді.
