Сонымен қатар Алматы – Түркістан – Ташкент – Самарқан – Бұхара бағыты бойынша «Jibek joly» және «Keruen Express» туристік пойыздары іске қосылды. 2024 жылдың қараша айынан бастап бұл пойыздар 5 сапар жасады. Туристік агенттіктердің өтінімдерінің түсуіне қарай бұл пойыз жүруді жалғастырады.
«Ішкі бағыттарға келетін болсақ, осы жылдың 1 наурызынан бастап Балқаш – Алматы пойызы тұрақты негізде жүреді. Қаңтар айынан Мемлекет басшысының Щучье-Бурабай курорттық аймағын дамыту жөніндегі тапсырмасы аясында жаңа вагондардан құрылған Астана-Бурабай курорты бағыты бойынша жедел электр пойызы іске қосылды. Жол жүру уақыты 2,5 сағатты құрайды. Осыған ұқсас жаңа электр пойызы маусым айынан бастап Қарағанды – Астана бағыты бойынша іске қосылады. Қосымша үшінші электр пойызы қыркүйек айынан бастап Астана-Бурабай курорты бағыты бойынша жүреді. 2024 жылдың 4 тоқсанынан бастап Қарағанды мен Павлодардан Бурабай курортына дейінгі электр пойыздарының маршруттары ұзартылды», – деп атап өтті спикер.
Жылжымалы құрамның жалпы паркінде 2600 вагон бар. Соңғы жылдары жолаушылар вагондарын жаңарту бойынша белсенді жұмыстар жүргізілуде. 2024 жылы 143 вагон сатып алынды. Соңғы 5 жылда тозу деңгейі 59-дан 42%-ға дейін төмендеді. Ағымдағы жылы сатып алу көлемі 226 бірлікке дейін ұлғайтылады.
«Вагондарды сатып алу негізінен отандық ЗИКСТО және Stadler вагон жасау зауыттары жүзеге асырады. 51 Stadler вагоны алғаш рет ағымдағы жылдың желтоқсан айында жеткізіледі, олар Астана – Алматы және Астана – Семей бағыттарына жіберіледі. 2026-2030 жылдар аралығында 873 вагон сатып алынады, бұл барлық вагонды ауа баптау жүйесімен қамтамасыз етуді ескере отырып, қолданыстағы паркті 90%-ға жаңартуға мүмкіндік береді. Осылайша, 2030 жылға қарай вагондардың орташа қолданыс мерзімі 10 жылды құрайды», – деді Жәнібек Тайжанов.
Комитет басшысының айтуынша, жазғы тасымалдау кезеңінде жолаушылар пойыздарын бақылау шаралары күшейтіледі. Атап айтқанда, ведомствоның аумақтық инспекциялары жолаушылар пойыздарын олардың кестелеріне сәйкес мезгіл-мезгіл тексеруді жүзеге асырады. Бұзушылықтар анықталған жағдайда тасымалдаушылар субсидиялау шарттары шеңберінде әкімшілік жауапкершілікке тартылып, тұрақсыздық айыппұлын төлейтін болады.
Сұранысы ең жоғары бағыттар бойынша тасымалдау ережелерінің сақталуын мониторингтеу үшін тасымалдаушылар мен Көлік министрлігінің өкілдері қатарынан мобильді топтар ұйымдастырылмақ. «Құпия сатып алушы» әдісі қолданылады. Денсаулық сақтау министрлігімен бірлесіп, вагондардың санитариялық-эпидемиологиялық жай-күйін тексеру жөніндегі бақылау шаралары күшейтіледі. Жолаушылар қауіпсіздігін қамтамасыз етуге ерекше көңіл бөлінеді.
ОРТАЛЫҚ КОММУНИКАЦИЯЛАР ҚЫЗМЕТІ
