Дубайда өтіп жатқан беделді UAE SWAT Challenge халықаралық сайысының үшінші күні қазақстандық бөлімшелер үшін нағыз жеңіс салтанатына айналды. Отандық командалар «Офицерді құтқару» кезеңінде жоғары кәсібилік танытып, үздік үштікті түгелдей иеленді, – деп хабарлайды 7-su.kz ақпараттық порталы.
Бұл кезеңде «Kazakhstan А» командасы ерекше табандылық көрсетті. Олар белгіленген тапсырманы небәрі 02:00 минут ішінде орындап, турнир тарихында рекордтық көрсеткіш орнатты. Бұл нәтиже оларды жалпы кестеде көшбасшылар қатарына шығарды. Күміс жүлде «Kazakhstan В» құрамасына бұйырса, үшінші орынды «Kazakhstan C» иеленді. Осылайша, әлемнің ең таңдаулы арнайы бөлімшелері жиналған додада Қазақстанның көк байрағы қатар желбіреді.
Сайысқа қатысып жатқан өзге де командаларымыздың қарқыны қуантады. «Kazakhstan D» тобы 19-орынға тұрақтаса, олардан кейінгі сатыда «Tomiris» қыздар командасы келеді. Әйелдерден құралған бұл бөлімше өздерінің бұрынғы үздік көрсеткішін қайталап қана қоймай, көптеген ерлер командасын шаң қаптырып кетті. Бұл – қазақстандық әйел қызметкерлердің дайындық деңгейі халықаралық стандарттарға толық сай келетінінің дәлелі.
Үш кезеңнің қорытындысы бойынша «Kazakhstan С» командасы турнир кестесінде сенімді түрде бірінші орында тұр. Олардың ізін ала «Kazakhstan А» командасы екінші сатыға жайғасты. 48 елден келген 109 мықты ұжымның ішінде осындай нәтиже көрсету – отандық құқық қорғау органдары мен арнайы жасақтың жауынгерлік қабілетінің жоғары екенін аңғартады.
UAE SWAT Challenge – бұл жай ғана жарыс емес, бұл тактикалық шеберлік, төзімділік пен жылдамдықты сынайтын әлемдік деңгейдегі емтихан. Мұндағы жеңіс елдің қауіпсіздік саласындағы беделін арттырып, халықаралық әріптестікті нығайтуға жол ашады.
