Бұрын қарапайым анықтама алу немесе жәрдемақы рәсімдеу үшін халыққа қызмет көрсету орталығына барып, ұзақ кезекте тұру қалыпты жағдай еді. Қазір жағдай түбегейлі өзгерді, себебі мемлекеттік қызметтердің басым бөлігі электронды форматқа көшіп, көптеген рәсімді үйден шықпай-ақ орындауға мүмкіндік пайда болды. Бүгінде смартфон арқылы жаңа туған сәбиді тіркеуге, әлеуметтік төлем рәсімдеуге, жүргізуші куәлігін ауыстыруға, емханаға тіркелуге, зейнетақы жинағын тексеруге, тіпті техникалық паспорт алуға болады, – деп хабарлайды 7-su.kz ақпараттық порталы.
Электрондық үкімет порталының іске қосылғанына 20 жыл толды. Осы уақыт ішінде қарапайым анықтама беретін сервис толыққанды мемлекеттік цифрлық экожүйеге айналды. Қазір елімізде 1300-ден астам мемлекеттік қызмет көрсетілсе, соның шамамен 90 пайызы онлайн қолжетімді. Порталда 15 млн пайдаланушы тіркелген.
Бұрын сәби туғаннан кейін ата-аналар туу туралы куәлік алу үшін АХАТ бөліміне, кейін жәрдемақы рәсімдеуге және балабақша кезегіне тұру үшін өзге органдарға бөлек-бөлек жүгінетін. Қазір бұл рәсімдер eGov Mobile арқылы бір жүйеге біріктірілген.
2026 жылы айлық есептік көрсеткіш (АЕК) мөлшері 4 325 теңгені құрайды. Соған сәйкес бірінші, екінші және үшінші балаға 164 350 теңге, төртінші және одан кейінгі балаға 272 475 теңге көлемінде біржолғы жәрдемақы тағайындалады. Ал жұмыс істемейтін ата-аналарға бала бір жарым жасқа толғанға дейін ай сайын 24 912-38 493 теңге аралығында төлем беріледі.
Соңғы жылдары мемлекеттік қызмет көрсету жүйесіне проактивті формат енгізілді. Азамат мемлекеттік органға өзі жүгінбей-ақ, 1414 нөмірінен келетін SMS-хабарлама арқылы Отбасының цифрлық картасы көмегімен тиісті қолдауды автоматты түрде алады.
Электронды үкімет арқылы көпбалалы отбасыларға арналған жәрдемақы, мүгедектік бойынша төлем, атаулы әлеуметтік көмек пен тұрғын үй көмегін оңай алуға болады. Мәселен, 2026 жылғы 1 сәуірдегі жағдай бойынша атаулы әлеуметтік көмек 31,1 мың отбасыдағы 167,4 мың адамға тағайындалған.
Жаңа бастамалар да бар: 12 шілдеден бастап жер учаскесіне мемлекеттік акт беру қызметі толықтай онлайн форматқа өтті. Енді бұл қызмет ХҚКО-ларда көрсетілмейді. 1 маусымнан бастап техникалық паспортты рәсімдеу цифрлық режимге ауысты. Дайын құжат пайдаланушының жеке кабинетіне жолданады. eGov Mobile қосымшасында 39 түрлі цифрлық құжат, соның ішінде жеке куәлік пен жүргізуші куәлігі сақталған.
Мемлекеттік қызметтердің онлайн форматқа көшуі уақытты айтарлықтай үнемдегенімен, ақпараттық жүйелердегі деректерді сәйкестендіру, егде жастағы азаматтардың цифрлық сауаттылығын арттыру және шалғай елді мекендерді сапалы интернетпен қамту міндеттері өзектілігін жоғалтқан жоқ. Қазақстанның цифрландыру саласындағы бұл қадамдары тұрғындардың тұрмыс сапасын арттыруға тікелей бағытталған.
