Әлеуметтік желілерде қазақстандықтар зейнетақы жинақтарының қысқарғанын айтып, алаңдаушылық білдіруде. Қолданушылар жариялаған мәліметтерге сүйенсек, шоттарға тұрақты түрде міндетті жарналар түсіп отырғанына қарамастан, жалпы жинақ көлемі төмендеген, – деп хабарлайды 7-su.kz ақпараттық порталы.
Желі пайдаланушыларының бірі 2026 жылдың ақпанынан сәуіріне дейінгі аралықтағы көрсеткіштерді салыстырып, осы кезеңде шоттағы қаражат шамамен 40 мың теңгеге азайғанын мәлімдеген. Оның айтуынша, бұл уақыт ішінде аударымдар үздіксіз жүргізілген.
Тағы бір азамат бірнеше күн ішінде жинағы 50 мың теңгеге кемігенін жеткізсе, өзге қолданушылар бірнеше ай ішінде 250 мыңнан 1 миллион теңгеге дейінгі аралықта төмендеу болғанын атап өткен. Олар қаражаттың себепсіз қысқаруына қатысты түсініктеме сұрап, бұл жағдайдың мән-жайын білгісі келетінін жазған.
Аталған мәселеге байланысты Бірыңғай жинақтаушы зейнетақы қоры түсініктеме берді. Қордың мәліметінше, зейнетақы жинақтарының көлемі инвестициялық табысқа тікелей байланысты. Ал инвестициялық кіріс қаржы нарығындағы жағдайға қарай өзгеріп отырады, яғни белгілі бір кезеңдерде өсім де, төмендеу де болуы ықтимал.
Мамандардың айтуынша, мұндай қысқа мерзімді ауытқулар қалыпты құбылыс саналады. Себебі зейнетақы активтері ұзақ мерзімге бағытталған инвестиция ретінде қарастырылады. Сондықтан олардың тиімділігін бағалау кезінде қысқа кезеңдерге емес, ұзақ уақыт аралығына назар аудару ұсынылады.
Айта кетейік, бұған дейін Еңбек және халықты әлеуметтік қорғау вице-министрі Виктория Шегай зейнетақы жүйесін жетілдіруге қатысты бірқатар өзгерістер қарастырылып жатқанын хабарлаған болатын. Соның бірі – зейнетақы аннуитеті. Бұл тәсіл арқылы азаматтар өз жинақтарының белгілі бір бөлігін сақтандыру ұйымына аударып, өмір бойына тұрақты төлем алу мүмкіндігіне ие болады.
