«Жеңіс» саябағының ашылатын сәтін қарабұлақтықтар ұзақ күтті. Әу баста саябақты «Монолит» ЖШС 2021 жылы қолға алып, 2022 жылдың маусымында аяқтауы тиіс еді. Алайда аталған мердігер әр нәрсені бір сылтауратып, істі кейінге қалдырып соңы соттың араласуымен шешілген. Араға уақыт салып «OTERMA 2022» ЖШС саябақты қайта жаңғыртып, жаңалауды өз мойнына алып, жұмысты тиянақты аяқтады. Саябақтың жалпы аумағы 5,6 гектар. Онда 3 әмбебап спорт алаңы (футбол, волейбол, баскетбол), 4 балаларға арналған ойын алаңы, 67 орындық, 1 санитарлық нысан бар. Сонымен қатар веложолақ пен жүгіру жолы салынып, жаяу жүргіншілер жолына 400 тонна асфальт төселген. Ал саябақ ішіндегі 455 ағашпен түрлі гүлзар арнайы арық жүйесі арқылы суарылады.
– Осындай керемет саябақ ашылып жатыр. Халықтың көңілі көтеріңкі. Енді осыған бәріміз бір кісідей қамқорлықпен қарап, күтіп-баптауымыз қажет. Аялап ұстап, келешек ұрпаққа бүлдірмей беруіміз керек, – дейді аудандық ақсақалдар алқасының төрағасы Қалабек Тастанбаев.
Ашылу салтанатында саябақтың лентасын аудан әкімі Елдос Ахметов пен Қалабек Тастанбаев кесті. Артынша ауыл әжелері шашу шашып, өнерпаздар ән-күймен жиналғандарды бір серпілтіп тастады. Жүздері қуанышқа толған жандар саябақты аралап көрді.
Қарабұлақ ауылдық округіне қарасты Абай ауылында балаларға арналған ойын алаңы пайдалануға берілді. Жұмысқа жұмсалған жалпы қаржы 13 миллион теңге. Көктемде құжаттары дайын болған алаңды мердігер компания 2 ай ішінде аяқтаған.
– Абай ауылында былтыр газдандыру жүйесі толық аяқталып, су құбырларын тарту жұмыстары бітті. Оның алдында жаңа мектеп салынып, орталық көшелерге асфальт төселді. Енді, міне, балаларға арналған арнайы алаңды ашып отырмыз. Әр баланың дені сау, мықты болып өсуі үшін жағдай жасауға тиістіміз, – деді өз сөзінде аудан әкімі Елдос Тұрсынбайұлы.
Ауыл ақсақалы Мәдібек Нұртас алаңның ашылуында жиналғандарға бата беріп, тілегін айтты. Артынша аудан әкімімен бірлесіп лентасын қиды.
– Бұрын арнайы ойнайтын жер болған жоқ. Бәріміз мектептің ауласында жүретінбіз. Енді ойын алаңы ашылып, қуанып жатырмыз. Кең екен, – дейді 1-сынып оқушысы Мұрат Қазыбек.
Серік ҚАНТАЙ
