Тек өзінің ғана емес, айналадағы ортаның тазалығын сақтау – мәдениеттің белгісі. Көшеде қоқыс тастамай, ауланы, мектепті, жұмыс орнын таза ұстау – әр адамның міндеті. Өкінішке қарай, кейде табиғат аясында демалып отырып, артынан қоқыс қалдырып кететін жандар кездесіп жатады. Мұндай әрекеттер табиғатқа, жануарлар мен адамдарға зиян келтіреді. Осы ретте Талдықорғанда бір тәулікте бейнебақылау арқылы қоқыс тастаудың 22 фактісі анықталды.
Талдықорған қаласында қоғамдық орындардың тазалығы мен тәртібін қамтамасыз ету бағытындағы жұмыстар қарқынды жүргізілуде. Жетісу облыстық Полиция департаментінің Жедел басқару орталығы (ЖБО) орнатқан бейнебақылау жүйелерінің арқасында бір тәуліктің ішінде қоқысты рұқсат етілмеген орындарға тастаудың 22 құқықбұзушылығы тіркелді.
– Біз барлық құқықбұзушылықты бейнекамералар арқылы дер кезінде тауып, шара қолдындық. Заң бұзған тұлғалардың кімдер екені нақты анықталды. Қажетті әкімшілік шаралар қабылданып, олар жауапкершілікке тартылды. Бейнебақылау қазіргі таңда қоғамдық тәртіпті қамтамасыз етудің ғана емес, экологиялық құқықбұзушылықтардың алдын алудың да тиімді құралына айналды. Тұрғындарды саналы болуға, қоршаған ортаны ластамауға шақырамыз, – дейді Талдықорған ҚПБ ЖБО бастығының орынбасары, полиция майоры Данияр Токкулиев.
Құқық қорғау органдарының өкілдері рұқсат етілмеген орындарға қоқыс тастап, абаттандыру ережелерін бұзу айналадағы адамдар мен туған қалаға деген құрметсіздіктің белгісі екенін айтады. Мұндай әрекеттер үшін әкімшілік айыпұл салу көзделгенін, ал жүйелі құқықбұзушылықтар болған жағдайда жаза күшейтілетінін ескертеді.
Жанар КАЛЫКОВА,
Жетісу облысы ПД баспасөз хатшысы
полиция майоры
