Ертең Мұсылман үмбетінің ұлық мерекесі Құрбан айт мейрамы. Осыған орай Бейсен Құранбек атындағы Журналистер үйінде Жетісу облысының дін өкілдері, санитарлық қызмет және дін істері басқармасының басшылары алдағы айтулы күндердің ережелері мен сақтық шараларын баяндады.
Қазақстан мұсылмандары діни басқармасының (ҚМДБ) мәліметі бойынша, биыл қасиетті Құрбан айт мерекесі 27 мамырда таңғы намаздан кейін басталып, 3 күнге жалғасады. Өңірдегі барлық мешіттерде мерекелік айт намазы таңғы сағат 06:00-де оқылады.
Өңірдің бас имамы Керімбек Дәуітов Құрбан айттың мұсылман қауымы арасындағы бірлікті нығайтуға, шынайы жанашырлық пен мейірімділік танытуға арналған ерекше уақыт екенін атап өтті. Имамның айтуынша, айт күндері ізгі істер жасап, мұқтаж жандарға қол ұшын созу – әрбір мұсылманның парызы. Сонымен қатар, дін өкілі бұл мейрамды ұлттық нақышта ұлықтаудың маңызына тоқталып, тұрғындарды айт күндері қазақтың ұлттық киімдерін киіп жүруге шақырды. Бұл дініміз бен дәстүріміздің сабақтастығын көрсетпек.
Облыстық дін істері басқармасының басшысы Сағыныш Жанабай құрбандық шалудың тәртібін түсіндірді.
Биыл бұл ғұрып дәстүрлі офлайн форматта да, қашықтан онлайн режимде де жүзеге асырылады. Жиналған құрбандық еттері еріктілер мен имамдардың көмегімен толықтай мұқтаж отбасыларға үлестіріледі. Қайырымдылық акцияларының қарбалассыз, жүйелі өтуі үшін жергілікті билік арнайы жоспар бекітіп, ауқымды дайындық жұмыстарын жүргізуде. Қауіпсіздікті қамтамасыз ету мақсатында жауапты қызметтер тарапынан тұрақты түрде рейдтер ұйымдастырылады, – деді маман.
Спикерлер тұрғындарды ысырапшылдыққа жол бермей, сыпайы дастархан жаюға, сондай-ақ мал сою сәтін видео мен суретке түсіріп, әлеуметтік желілерге таратпауға шақырды. Жергілікті атқарушы органдар да ҚМДБ бастамаларына толық қолдау көрсетіп отыр. Мереке күндері мешіт аулаларында сәнді киіз үйлер тігіліп, ұлттық ойындар мен этномәдени іс-шаралар ұйымдастыру жоспарланған.
Баспасөз мәслихатында спикерлер санитарлық-эпидемиологиялық жағдайға ерекше назар аударды. Облыстық санитарлық-эпидемиологиялық бақылау департаменті басшысының орынбасары Самат Ахметов құрбандыққа шалынатын малдардың қауіпті инфекциялық аурулары болуы мүмкін екенін айтты:
Құрбандыққа шалынатын малды тек әкімдік бекіткен ресми орындардан және мамандандырылған базарлардан сатып алу қажет. Әрбір ет партиясына ветеринарлық анықтама талап етілуі тиіс. Сондай-ақ, мал сою тек белгіленген алаңдарда жүргізілуі шарт. Белгіленбеген орындарда мал сою – ауру жұқтыру қаупін айтарлықтай арттырады, – деді ол.
Мамандар мешіт жанында ас беруді жоспарлап отырған азаматтарға қатымхананың барлық жағдайы (ыдыс жуатын құрал, тоңазытқыш, пеш, қойма) сай екеніне көз жеткізуді ескертеді. Санитарлық дәрігерлер ас дайындауды кәсіби мамандарға тапсырып, ресми қоғамдық тамақтану орындарына жүгінуді ұсынады.
Мейрамхана, кафе және асхана иелері технологиялық процестерді, өнімдерді тасымалдау және сақтау ережелерін, мерзімдерін қатаң бақылауда ұстауы тиіс. Персоналдың медициналық кітапшасы болуы, дайын тағаммен жұмыс істегенде бір реттік қолғаптар мен бөлек құрал-саймандарды пайдалануы міндетті. Қоғамдық тамақтану орындарында үйде дайындалған тағамдарды қолдануға үзілді-кесілді тыйым салынады. Осы қарапайым ережелерді сақтау уланудың алдын алып, қасиетті мерекені денсаулыққа еш зиянсыз, жоғары деңгейде өткізуге септігін тигізеді.
