Маған жаз айлары ұзақ та қызықты демалысымен ұнайды. Бұл мезгілде көбіне күн ашық, жайма-шуақ қалыпта өтеді. Аптап ыстық күндері де болады. Ондай уақыттарда суға шомылып, ерекше сергіп алғанға ештеңе жетпестей көрінетіні бар. Биылғы тынығу маусымы құрбым екеумізге өте қатты ұнауда.
Осы жылы оқушылар үшін қаламыздағы «Балалар шығармашылық орталығы» жанынан жазғы лагерь ашылды. Құрбым Әдемі екеуміз аталған демалыс ордасында әр күнімізді қуанышпен, қайталанбас қызықты сәттермен әсерлі күйде өткізіп жатырмыз. Мұнда жүргенімізге 3 апта болды. Осы аралықта бұрын танып, білмеген ұл-қыздармен таныстық. Бәріміз бірге тату-тәтті ойын ойнап, ән шырқап, логикалық сұрақтардың жауабын бірге іздеп уақытымызды босқа өткізбеуге тырысудамыз.
Біз тәлімгерлерімізбен бірге экскурсия жүргіздік. Қаланың көрікті жерлерін аралап, балалар кітапханасына, саябақтарға бардық. Есімізден кетпес оқиғалар, түрлі форматта ұйымдастырылған шара көп.
Әдемі екеуміз кішкентайымыздан бірге өсіп келеміз. Үнемі бірге ойнаймыз, бірге серуендейміз. Жазғы демалыста жаныма жақын жанның қасымда болғаны мені қатты қуантады.
Құрбым өте ашық-жарқын, мінезі көркем, инабатты қыз. Әрдайым қолындағысымен бөлісуге дайын тұрады. Ешкімді бөліп-жарып қарамайды. Маған, ең бастысы, оның достыққа адалдығы ұнайды. Сіздер де Әдемі сияқты құрбыларыңызбен демалыс айларын қызықты өткізіп жатқан боларсыздар?!
Жансұлу ЖҰМАБАЙ,
оқушы
