Облысымыздағы бұқаралық ақпарат құралдарының көшбасшысы болып тұрған «Jetіsý» газетінің тарихы сонау 1918 жылдан бастау алады.
Ғасыр жасаған газеттің көтерген жүгі ауқымды. Сондықтан әр ауыл мен аудандардағы атқарылып жатқан жұмыстарды, тарихты, салт-дәстүрімізді, танымал тұлғаларымызды дәріптейтін мақалаларды оқу үшін «Jetіsý» газетінің әр санын жібермей қараймын. 1968 жылдан бері ғасырдан асқан ата басылымның тұрақты оқырманымын.
Газет – руханияттың қайнар көзі. Ал, сол рухани байлығымызға сүбелі үлес қосып отырған «Jetіsý» газетінен керектінің барлығын таба аласыз. Оның түпкі негізі әу бастағы құрылымында. Ата басылымда Ілияс Жансүгіров, Сәкен Сейфуллин, Мағжан Жұмабаев, Жүсіпбек Аймауытов сынды Алаш арыстарының ізі қалған. Бұл газетте тек Жетісудың ғана емес, бүкіл қазақтың тарихы жатыр. Қазіргі қоғамда технология қанша жаңарса да, Алаш арыстарының қолтаңбасы қалған ата басылым мәңгі өмір сүрері сөзсіз. Сондықтан көзі қарақты оқырмандарды Алаштың үні, қоғамның айнасы болған «Jetіsý» газетіне жазылуға шақырамын!
Құлтай НҰРҚАЛБАЙҰЛЫ,
тарихшы, өлкетанушы
Суретті түсірген Жұмабай МҰСАБЕКОВ
