Жетісу гарнизоны 54380 әскери бөлімінің қызметшілері Талдықорғандағы №16 орта мектептің жоғары сынып оқушыларына арнайы ерлік сабағын өткізді.
Кеңес әскерлерінің Ауған жерінен шығарылған күніне орай ұйымдастырылған іс-шараның басты мақсаты – кешегі елін, жерін қорғау жолында ерен ерлігімен танылған бабаларды кеңінен дәріптеу. Сонымен қатарит, жастарды отансүйгіштікке баулып, олардың бойына патриоттық пен ержүректілікті қалыптастыру.
Сабақ барысында әскери бөлімнің өкілдері мен Ауған соғысының ардагері Мұхтар Ахметжанов оқушылармен емен-жарқын әңгімелесіп, жастарды әскери сапта шынығып, елдің патриоты болуға шақырды. Сондай-ақ, олар өздерінің әскери қызметте болған кездегі бастан кешкен қызықты оқиғаларымен бөлісіп, мақсатқа жету үшін адамда мінез бен тәртіптің болуы ауадай қажет екенін жан-жақты түсіндірді.
– Бүгінгі «Рухты елдің – ұрпағы қайсар» деген тақырыппен өткен ерлік сабағының өскелең ұрпақ үшін тәрбиелік маңызы зор. Себебі, бұл әрбір жасты ұлтжандылыққа, инабаттылық пен достыққа, адал адамгершілікке тәрбиелейді. Сондықтан да кешегі батыр бабалардың қайсарлығын дәріптеу бүгінгі жастар санасына өшпес өнеге сыйлайтыны анық,– дейді 54380 әскери бөлімі командирінің орынбасары майор Асхат Оспанов.
Тақырыпқа орай айта кетейік, Қазақстан Республикасы Үкіметінің 2023 жылғы 24 қарашадағы № 1039 қаулысымен бекітілген жастарға әскери-патриоттық тәрбие берудің 2030 жылға дейінгі тұжырымдамасы мазмұнында нәтижеге бағдарланған жастарға әскери-патриоттық тәрбие беру жүйесі қалыптастырылуға тиіс делінген.
Жастар бойында азаматтық кемелдену, Отанға деген сүйіспеншілік, жауапкершілік, борыш сезімі және дәстүрге адал болу сияқты әлеуметтік өте маңызды қасиеттерді қалыптастыру мен дамыту арқасында олардың қоғам қызметінің әртүрлі, оның ішінде әскери қызмет саласындағы аса маңызды проблемаларын шешуге белсенді қатысу мүмкіндігі біршама артады, қазіргі заманғы жастардың мінез-құлық сапасы жақсаруда, бұл жалпы қоғамға оң әсер етеді. Жастардың жоғары руханилығы, адамгершілігі, белсенді азаматтық ұстанымы, патриоттық санасы еліміздің әлеуетін арттыруға байланысты міндеттерді табысты шешуге ауқымды дәрежеде ықпал ететін болады.
Әскери-патриоттық тәрбие беруді жақсарту мультипликативті түрде ықпал етеді және мемлекеттің әлеуметтік-экономикалық өрлеуіне, құқықтық және саяси әлеуетін нығайтуға, елдің қорғаныс қабілеті мен қауіпсіздігінің артуына оң әсер етеді. Патриоттық тәрбие алған жастар қазіргі қоғамның жасампаз әлеуетінің ең құнды компонентіне айналу мән-жайы ерекше маңызды, ол, ең алдымен, Қазақстанның болашағы үшін өзіне жауапкершілік алуға дайын болумен айқындалады.
Айдын КӘЛІМХАН
