Ол бұған дейін қоғамда тараған түрлі болжамдар мен қауесеттерге тоқталып, оқиғаның нақты мән-жайын бұрмалап көрсетуге жол бермеуді сұрады.
«Мен бұл жағдайға қандай да бір қатысым бар деген бастапқыда тараған барлық қауесетті үзілді-кесілді жоққа шығарамын. Ата-анамнан алған тәрбием мен бойымдағы сенім мені ешқашан арсыздық жолына түсірмейді», — деді Алданова.
Бұған дейін кейбір БАҚ пен әлеуметтік желіде күдікті шенеунікке әйелі үшін кек алғаны жөнінде бейресми ақпарат тараған болатын. Алайда Алданова мұндай мәліметтер шындыққа жанаспайтынын айтты.
Оның сөзінше, бұл жағдай тек отбасына ғана емес, барша жақындарына ауыр тиген.
«Біз әр минут, әр сағат, әр күн сайын Руслан Берденовтің амандығы үшін алаңдап, дұға жасадық. Жуырда оның емделіп, үйіне оралғанын білдік. Енді біз оған шын жүректен сауығып, елге қызметіне қайта оралуын тілейміз», — деп жазды ол өз мәлімдемесінде.
Сөзінің соңында Алданова бұл оқиғаны «тағдырдың ауыр сынағы» ретінде қабылдап отырғанын айтып, тергеудің әділ және шынайы шешім шығаратынына сенім білдірді.
Еске салайық, Руслан Берденовке шабуыл 2025 жылдың басында жасалып, ол ауыр жарақатпен ауруханаға түскен болатын. Қазір шенеуніктің жағдайы жақсарып, үйіне оралғаны хабарланды. Тергеу амалдары жалғасып жатыр.
