Талдықорған қаласының әкімі Ернат Бәзіл шаһардың оңтүстік-батыс бөлігіндегі 9-шы жаңа шағын ауданына барып ондағы бой көтеріп жатқан көпқабатты тұрғын үйлердің құрылыс жұмыстарымен танысты. Осы орайда шаһар басшысы мердігер компания өкілдерімен кездесіп, абаттандыру, кәріз, ауыз су жүйесі тағы басқа да мәселелер бойынша басталған жобаларды көзбен көріп, әр жұмысты сапалы әрі уақытылы аяқтауды ескертті.
Осы орайда қала басшысы ірге тасы енді қалана бастаған волейбол орталығының және Қаблиса жырау көшесінде жаңадан басталған жылыту құбырларын ауыстыру жұмыстарына да арнайы ат басын бұрды. Сонымен қатар, Көктал шағын ауданы, сондай-ақ, 3 бөлімше аумағындағы күрделі жөндеу жұмыстары жүргізіліп жатқан жол құрылыстарын да аралап қайтты.
Ернат Дүйсенбекұлының сөзінше, 3 бөлімшеде басталған жол жөндеу жұмыстары 2024-2026 жылдар аралығында жүзеге аспақ. Қазір аймақта жөндеуден өтуге тиіс жалпы ұзындығы 15 шақырым жол, 20 көше бар. Биылғы жылы соның 3 көшесі яғни 2,5 шақырымы жөндеуден өтеді.
Шаһар басшысы құрылыс нысандарын аралау кезінде көзге түскен бірқатар кемшіліктерді сынға алып, оны уақыт өткізбей жоюды тапсырды.
– Ел Президентінің тапсырмасына сай бүгінде мұқтаж адамдарды тұрғын үймен қамтамасыз етіп, халықтың өмір сүру сапасын көтеру ең өзекті мәселелердің бірі. Сондықтан мемлекеттік бағдарламалардың арқасында қазір осы мәселеге баса назар аударылып, көптеген оң бастамалар қолға алынуда. Бүгінгі күнде Талдықорған қаласы бойынша 15 мыңнан астам адам тұрғын үй кезегінде тұр. Осыған дейін олардың біразы қоныстойын тойлады. Қолданысқа берілген үйлердің біразы жергілікті бюджет есебінен тағы біразын жеке кәсіпкерлер мен меценаттар өз қаражаттарына тұрғызылған. Әр жылы 2 мыңнан астам адамды тұрғын үймен қамту жоспарда. Сонда алдағы бірнеше жылда кезекте тұрған азаматтардың басым көпшілігі баспанамен қамтылатын болады, – деді шаһар басшысы.
Айдын КӘЛІМХАН
