Жас ұрпақты тәрбиелеу білім беру ордасынан басталады. Қазіргі қоғам талабы – жастарды сыбайлас жемқорлыққа қарсы қою. Осы ретте Талдықорған қаласында жастардың құқықтық санасын арттыруға бағытталған «Саналы ұрпақ – 2025» байқауы өтті.
Облыстың 18 колледжінен келген студенттер білім мен біліктілікті ұштастыратын ерекше жарыста бас қосты. Quest ойындары форматында өтетін сайыс қатысушылардың өз білімдері мен шығармашылық қабілеттерін бейнеүзіктер мен ерекше әнұрандар арқылы көрсетті.
– Сыбайлас жемқорлыққа қарсы күрес – тек мемлекеттік органдардың ғана емес, бүкіл қоғамның міндеті деп ойлаймын. Сондықтан біз білім беру мекемелерінде осындай шараларды жиі өткізіп тұрамыз. Бұл жолғы жарыс үлкен көлемде болды. Оқушылар өздерінің әділдікке деген көзқарасын бейнеүзік, әнұрандар мен шығармашылық қойылымдар арқылы жеткізді. Біз үшін ең бастысы – жастардың осы мәселе төңірегінде ой түйіп, болашақта парасатты азамат болып қалыптасуына ықпал ету, – дейді политехникалық колледж әдіскері Лаура Орманова.
Екі кезеңнен тұратын байқауға 50-ден астам студент қатысты. Арнайы құрылған сарапшылар жас шәкірттердің креативтілігін, топпен жұмыс істеу қабілетін бағалады. Одан бөлек ұжымдық байланысқа аса мән берді.
Жиын соңында байқау жеңімпаздарына облыстық әдістемелік орталықтың І, ІІ және ІІІ дәрежелі дипломдары беріліп, бағалы сыйлықтар табысталды.
Мұрат КҮМІСБЕК
ЖУ студенті
Фото: volgatech.net
