Сарқан ауданындағы Басқан өзенінде екі шағын су электр стансысы, ГЭС-2 және ГЭС-3 каскадының құрылысы бойынша ауқымды инвестициялық жобаны жүзеге асыру аяқталды.
Өткен жылғы қазан айының ортасынан бастап ГЭС-2 электр энергиясы жалпы желіге беріле бастады. Жобаны «Baskan Power» ЖШС іске асыруда, ол 2013 жылдан бері өңірде гидроэлектр өндірісін табысты дамытып келеді. Айта кетейік, компанияның бірінші стансысы – жоғарғы Басқан ГЭС-1 – 2015 жылы пайдалануға беріліп, жыл сайын 20,1 млн. кВт. сағат электр энергиясын өндіруді қамтамасыз етті. Енді өңірде жылына 76,5 млн. кВт. сағатты құрайтын тағы екі стансы пайда болды.
– Қазақстан Даму банкімен бірлескен жұмыстың арқасында, деривациялық типтегі СЭС-ті іске асыру ерекшелігін, сондай-ақ, «Жаңартылған энергия көздерін қолдау жөніндегі есеп айырысу қаржы орталығы» ЖШС-мен электр энергиясын сатып алу шартының талаптарын ескере отырып, біз шағын Басқан СЭС каскадын іске асыруды уақытылы аяқтадық. Жоба өңірге инвестиция тартуға, жергілікті халық үшін жұмыс орындарын құруға және электр энергиясын өндіруді ұлғайтуға мүмкіндік берді. Сонымен бірге бұл Оңтүстік Қазақстан тұрғындары үшін импортқа тәуелділікті төмендету және тарифтерді тұрақтандыру жолындағы маңызды қадам, – дейді «Baskan Power» ЖШС компаниясының бас директоры Сәкен Мұратов.
ГЭС құрылысы барысында 200-ге тарта жұмыс орны құрылды, пайдалануға берілгеннен кейін 30 маман тұрақты жұмысқа орналастырылды. Жаңа ГЭС-терді басқару толық автоматтандырылған, ол заманауи технологиялар пайдалану кезіндегі шығынды төмендетуге мүмкіндік береді. Нысандар жаңа жабдықтармен жабдықталған, бұл олардың ұзақ мерзімге сенімді қызмет атқаруына ықпал етеді.
Жалпы құны 14,8 млрд. теңге болатын жоба «Қазақстан Даму банк» АҚ қолдауымен іске асырылуда, оның қатысуы 9,5 млрд. теңгені құрайды. «Қазақстан Даму банк» АҚ бас банкирі Төлеген Кәреновтың айтуынша, аталған жобаны қолдау банктің жасыл энергетиканы дамыту жөніндегі стратегиясына толық сәйкес келеді. Өңірдің табиғи-климаттық жағдайы мен Басқан өзенінің гидро-әлеуеті Жетісу облысы үшін тағы бір ГЭС-ті іске қосуға мүмкіндік берді. Бұл өз кезегінде ел ішінде өндірілетін жасыл электр энергия есебінен тапшылықты азайтуға көмектеседі.
Жетісу өңірінде ГЭС-2 мен ГЭС-3 енгізілгеннен кейін жалпы қуаты 287 МВт-тан асатын 17 жаңартылатын энергия нысаны жұмыс істейтін болады.
Айгүл БАЙБОСЫНОВА
Сарқан ауданы
