Сарқан ауданында 40 балаға арналған «Сенім» оңалту орталығы ашылды. Бұл туралы «Жетісу» газеті Сарқан ауданы әкімінің баспасөз қызметіне сілтеме жасап хабарлады.
Орталықтың ашылу салтанатына арнайы Алматы облысының жұмыспен қамтуды үйлестіру және әлеуметтік бағдарламалар басқармасының басшысы Маржан Мұратқызы келді. Мұндай орталық жалпы Жетісу жерінде 11 болса, оның 4-уі мемлекеттік мекеме. Ерекше күтімді қажет ететін балаларды оңалтуға арналған орталықтың ашылуына қолдау танытқан — жұмыспен қамтуды үйлестіру және әлеуметтік бағдарламалар басқармасы.
Орталықта заманауи арнайы құралдармен жабдықталған 22 кабинет, 55 жоғары білікті маман қызмет етуде. Сонымен қатар, орталықта балаларды тасымалдауға арналған жаңа авто көлік бөлінген.
Мұнда 8 бағытта қызмет көрсетіледі. Атап айтсақ, әлеуметтік-мәдени, әлеуметтік-экономика, әлеуметтік-психология, әлеуметтік-медицина, әлеуметтік-құқық салалалар бойынша көмек берілмек. Бұдан бөлек, нысан ауласы да аббаттандырылып, балаларға арналған ойын алаңқайлары жасалған.
— Мұндай орталықтарды мейлінше көптеп ашқан жөн. Ерекше күтімді талап ететін балаларды үйде ұстамау керек. Баланы арнайы білікті мамандарға апару арқылы қандайда бір жетістіктерге жетуге болады. Сарқан ауданында ашылып отырған орталықтың ерекшелігі, бұл жерде балаларды таңнан кешке дейін қалдыруға болады. Сондай-ақ, шалғай ауылдардан қатынайтындар ата-анаға осы орталықта 6 айға дейін қалып, ем қабылдауына мүмкіндік бар, — дейді басқарма басшысы Маржан Мұратқызы.
— Мен осы оңалту орталығының қаламызда ашылғанына өте қуаныштымын. Осы орталыққа 11 жастағы немеремді әкелдім, жаман емес, бәрі ұнайды. Жыл сайын елордаға оңалтуға баратын едік. Енді ешқайда сабылмай осы орталықтың мамандарына жүгінбекшімін, енді баламнан оң өзгерістер күтемін, — дейді қала тұрғыны Сәулет Нұрмұхамедқызы.
Айта кетейік, ескі нысанды күрделі жөндеуден өткізу үшін 27 млн.теңге қаражат жұмсалған.
«ЖЕТІСУ-АҚПАРАТ»
