Сарыөзек ауылындағы ауыз су сан жылдан бері тұрғындарды сарсаңға салып келген еді. Кезең-кезеңімен іске асырылып жатқан жұмыс нәтижесінде күн тәртібіндегі мәселенің күрмеуі тарқатылуда, – деп хабарлайды 7-su.kz ақпараттық порталы.
Ауылда ауыз су мәселесі 30 жылға жуық уақыт бойы толық шешілмей келді. Құбырлардың тозуы 75 пайызға жетіп, бір жерден ақау шықса, тұтас ауыл сусыз қалатын жағдай жиі болатын.
Мамандардың айтуынша, ауылдағы су жүйесіне түсетін жүктеме қалыпты деңгейден әлдеқайда жоғары. Норматив бойынша тәулігіне 1800 текше метр су жеткілікті саналса, іс жүзінде тұрғындар 10 сағаттың ішінде-ақ 3000 текше метрге жуық су тұтынады. Сондықтан тозығы жеткен ескі желі мұндай көлемді көтере алмай, ауыз су тұрақты берілмей келген.
Соңғы екі жылда аудан әкімдігі бұл мәселені түбегейлі шешуге кіріскен болатын. Мемлекеттен 4,5 миллиард теңге бөлініп, «Сарыөзек ауылының сумен жабдықтау жүйесін реконструкциялау» жобасы жүзеге асырылуда. Жоба аясында 99 шақырымнан астам жаңа су құбыры тартылып, 1 000-нан аса құдық, жүздеген ысырма мен өрт гидранты орнатылды.
Қазір ауылда 15 жұмыс бригадасы тұрғын үйлерді жаңа жүйеге қосып жатыр. Әр бригада күніне орта есеппен он шақты үйді орталық су құбырына жалғайды. Қосылу құны да тұрғындардың қалтасына салмақ салмайды. Мөлшері 15-25 мың теңге көлемінде. Тұрғындар ақшаны үйге дейін құбыр тарту мен су есептегіш құралын орнатуға төлейді.
