Талдықорған қаласының әкімі Ернат Бәзіл шаһардағы үздік оқу орындарының бірі – дарынды балаларға арналған «Білім-Инновация» мамандандырылған лицей-интернатында арнайы барып, ондағы мектеп бітіруші түлектерді құттықтап, ізгі тілегін жеткізді. Жиналған қауым алдында сөз алған Ернат Дүйсенбекұлы қазір аймақтағы білім саласына баса көңіл бөлініп, заман талабына сай жаңа мектептер бой көтеріп жатқанын айрықша атап өтті.
– Бүгін сіздер балалық шақпен қоштасып, үлкен өмірге қадам басқалы тұрсыздар. Алда түрлі сынақтар мен мүмкіндіктер күтіп тұр. Мен сіздердің ҰБТ-ны сәтті тапсырып, армандаған оқу орныңызға түсіп, еліміздің игілігіне қызмет ететін білікті маман болуларыңызға тілектеспін! Әр жетістігіңізде ұстаз бен ата-ананың үлесі бар екенін ұмытпаңыздар, – деді шаһар басшысы.
Айта кетейік, Талдықорғандағы 32 жылдық тарихы бар бұл «Білім-Инновация» лицей-интернатын биыл 41 түлек тәмамдамақ. Олардың арасында 7 оқушы – «Алтын белгіге», 5 оқушы – үздік аттестатқа үміткер. Ерекше атап өтерлігі, осы білім ордасының түлегі Сыдық Асылтай Нью-Йорк университетінің Абу-Даби қаласындағы филиалына «Жаратылыстану-математика» бағыты бойынша толық грант иегері атанды. Бұл – мектеп ұстаздарының кәсіби еңбегі мен Сыдық Асылтайдың табандылығының жарқын нәтижесі. Оның жетістігі Жетісу өңірінің білім сапасын халықаралық деңгейде танытқан.
Сала мамандарының мәліметінше, 2024–2025 оқу жылында Жетісу облысының орталығында 3720 бүлдіршін мектеп табалдырығын аттаса, 1442 оқушы мектеппен қоштасқан. Олардың 45-і – «Алтын белгі» үміткері болса, 68 түлек үздік аттестатпен бітіреді деп күтілуде. Ал ұлттық бірыңғай тестілеу (ҰБТ) биылғы жылы 16 мамырда басталып, 5 шілдеге дейін жалғасады.
Айдын КӘЛІМХАН
