Жетісу облысында жастардың саяси сауаттылығын арттыруға және көшбасшылық әлеуетін дамытуға бағытталған «Саяси серпін» жобасы аясында республикалық деңгейдегі семинар-тренинг өтті.
Іс-шараға Қазақстан Республикасы Парламенті Мәжілісінің депутаты Керімбек Болат Бақбергенұлы мен республикалық деңгейдегі тәжірибелі спикерлер қатысып, өңір жастарымен өз тәжірибелерімен бөлісті.
Семинардың негізгі мақсаты – жастардың азаматтық белсенділігін арттыру, саяси мәдениетін қалыптастыру, көшбасшылық қасиеттерін дамыту және қоғамдық-саяси үдерістерге саналы қатысуына қолдау көрсету.
Іс-шара барысында Қазақстан Республикасы Парламенті Мәжілісінің депутаты Керімбек Болат Бақбергенұлы идеологияның қоғам дамуындағы орны, ұлттық құндылықтарды дәріптеу және қоғамдық-саяси мәдениетті нығайтудың маңыздылығы туралы мазмұнды баяндама жасады. Ол жастардың қоғамдық өмірге белсенді араласуы, азаматтық жауапкершілігі мен ел болашағын қалыптастырудағы рөліне ерекше тоқталды.
Семинар аясында республикалық деңгейдегі спикерлер әлеуметтік және қоғамдық жобаларды әзірлеу мен тиімді басқару, жобаларды қаржыландыру тетіктері, қаржылық сауаттылықты арттыру, көшбасшылық қабілеттерді дамыту және жеке тұлғалық өсу бағыттары бойынша тәжірибелік дәрістер өткізді. Қатысушылар өздерін қызықтырған сұрақтарға жауап алып, тәжірибелік ұсыныстармен танысты.
Интерактивті форматта өткен кездесу ашық пікір алмасу алаңына айналып, жастардың жаңа бастамаларды жүзеге асыруына, қоғамдық жобаларды дамытуына және белсенді азаматтық ұстанымын қалыптастыруына тың серпін берді.
«Саяси серпін» жобасы жастардың саяси мәдениетін қалыптастыруға, көшбасшылық әлеуетін дамытуға және қоғамдық-саяси өмірге белсенді араласатын жаңа буын көшбасшыларын тәрбиелеуге бағытталған маңызды бастама болып табылады. Осындай білім беру алаңдары жастардың кәсіби және тұлғалық дамуына ықпал етіп, олардың қоғам мен мемлекет дамуына қосатын үлесін арттыруға мүмкіндік береді.
Жоба «Жетісу облысының қоғамдық даму басқармасы» мемлекеттік мекемесінің қаржылық қолдауымен жүзеге асырылды.
