Бұл ретте құқық қорғау органдарына артылар жүк басым және бұл саланы жан-жақты қолдау қажет. Әрине, құзырлы органдар бір ғана «Заң және тәртіп – мемлекеттің мызғымас тұғыры» ұранын ұстануы тиіс. Бастысы, заңсыздыққа, құқықбұзушылыққа қарсы тұруы қажет. Мемлекет басшысының сөзіне сенсек, сонда ғана қоғамда құқықбұзушылыққа, зорлық-зомбылыққа қарсы сана қалыптасады.
Қоғамда ұлттық әдеп һәм мәдениет құндылықтарын әспеттеп, татулық пен бірлік туын асқақтатуға шақырған. Президент отбасылық құндылықтың маңызын дәріптеп, ұрпақ тәрбиесіне терең мән беру керегін де жеткізді. Бастысы, мәдениетсіздік пен әдепсіздік еліміздің халықаралық беделіне де нұқсан келтіретінін қадап айтты. «Адамдарда дөрекі сөйлеп, бір-бірімен ерегісу, қоғамдық орындарда айғай-шу шығару жиі кездеседі. Өкінішке қарай, мұндай көріністердің ішінде балағат сөздер айтып, қоғамдық тәртіпті бұзатын әйелдер де бар. Бұл – мәдениетті, өркениетті қоғамға лайықсыз қылық, еліміздің халықаралық беделіне нұқсан келтіретін құбылыс», – дей келе, Қ.Тоқаев хакім Абайдың «Біріңді қазақ, бірің дос, көрмесең істің бәрі бос» тәмсілімен тұрмыс кешуге шақырды.
Еліміздегі саяси жүйені де жетілдіру Жолдаудан тыс қалмады. Президент жаһандану көшінен қалмай, цифрлы мемлекетке айналу үдерісін ілгерілетіп, сандық технологияны меңгеруге жаңа көзқарас керегін жеткізді. Ол үшін арнайы министрлік те құрылады. Сонымен қатар, бір палаталы Парламент құру бастамасын көтерді. Бұл шын мәнінде ел тағдыры үшін маңызды қадам болмақ. Парламенттік реформа тосыннан келген жай емес және бұл асығыс жүзеге асыра салуға болмайды. Мұны нық айтқан Мемлекет басшысы еліміздегі кез келген саяси үдеріс халықтың шешімінсіз жүзеге аспайтынын да жеткізді. Бұл шын мәнінде халық билігі, халықтық демократияның салтанат құрғанын айқын дәлелдесе керек. Айтпақшы, Жолдауда айтылғандай 2027 жылы жалпыұлттық референдум өтіп, Конституцияға тиісті өзгерістер енгізілетін болды.
Әдеттегідей Мемлекет халықтың тұрмыстық-әлеуметтік жағдайын да ескерусіз қалдырмады. Инфляцияның қазақстандықтар үшін ауыр соққы болып жатқанын ашық айтты. Күн көріс қиындағанын да жеткізді. Оған себеп, Қазақстанның сауда нарығында шетелдік тауардың басымдығы. Әрине, отандық өніммен ішкі нарықты толтыру мүмкін емес. Қоянқолтық экономикалық байланыс дәуірінде өз елін тек өз өнімімен ғана қамтып отырған ел жоқ әлемде. Дегенмен, Үкіметке Мемлекет басшысы ішкі нарықта барынша «Қазақстанда жасалған» өнім көлемін ұлғайтуды жүктеді. Сонымен қатар, Ұлттық банкпен бірлесіп халық табысын «жеп жатқан» инфляциямен күресуде нақты жоспар құрып, нақты әрекет етуді жүктеді және «арқан тартыс қылмауды» тапсырды.
Соңғы кезде жүзеге асқан салықты оңтайландыру реформасы елімізде сәтті жүзеге асты. Бұл Жолдауда Президент салықтық әкімшілендіруді түбегейлі жаңғырту да қажет екенін жеткізді. Сонымен қатар, салықтан түскен қаржы азаматтарға сапалы мемлекеттік қызмет көрсетіп, инфрақұрылым тұрғызуға және қолдау шараларын іске асыруға бағытталуы шарт. Бұл мемлекет пен бизнес арасындағы қарым-қатынастың сервистік жаңа үлгісін қалыптастыруға жол ашады. Шыны керек, Мемлекет басшысының бұл бастамалары салық жүйесін әділ әрі ашық етуге, мемлекеттік қызмет көрсетуді жаңа деңгейге көтеруге және кәсіпкерлікті дамытуға серпін бермек.
Жалпы, Жолдауда ел дамуына жаңа бастамалар көтерілді. Енді тек билік пен халық бірлікпен қабылдап, соны жүзеге асыру қажет. Ел дамуы үшін, Қазақстан өркендеуі үшін.
Арыстанғали АРЫН
«Amanat» партиясы Жетісу облыстық филиалы төрағасы
